theme-sticky-logo-alt
theme-logo-alt

Wa kyntoor pood chapoh Meghalaya, e Notice ka Supreme Court cha ka sorkar Assam

Ynne ka sngi ka yung bichaar wa khlieh dooh ka ri, ka Supreme Court da e Notice ko cha ka sorkar Assam wow pynche heiyatoh wa i kaam kajia pood hapyrdi ka Meghalaya wa ka Assam hadien wa ujor mukotduma ka Newyearly Thangkhiew Nongkseh, kawa man ka tre yong i thaw ha Them Marwet, Umling Community & Development Block iwa em hapoh ka Raid Marwet, Mylliem Syiemship, Ri-Bhoi District, Meghalaya.

Ha ka mukotduma wa da ujor ka Newyearly Thangkhiew Nongkseh pyrchah ya ka sorkar India wa kiwi kiwi katkam ka WP(C) 672/2021, da chong bichaar ya ka ynne ka sngi haphrang ka miej bichaar u Justice Justice Nazeer wa Justice Murari heiwa da ap ya ki muktiar yong ki ar liang.

Neiliang ka Newyearly da ong u wa ini i kaam yatoh i wa i kajia pood hapyrdi ka Assam wa Meghalaya kamjooh leh wa ka 6th Schedule yong ka riti synchaar ka India.

Ha kani ka mukotduma ka Newywearly da ujor ko katkam ka Article 32 ka riti synchaar ka ri heiyatoh wa u pood u ang hapyrdi ki ar jylla heiwa ka Assam State Transport Corporation da kyntoor pood ko chapoh u pood u ang ka Meghalaya deiwa sdang u pynkreh ya ka Depot ha i thaw yong ka.

Da ong ko wa ini i thaw toh u yoh yei yada neibynta ki jaitbru Ri-loom katkam ka Sixth Schedule tangwa da yaleh u pynkylla ya i thaw kam i thaw wa ymtoh de man i yong ki bru Ri-loom (Tribal Land to Non Tribal Land).

Chooh chooh da ong ko wa ka Assam State Transport Corporation hawa sdang u snem 2020 da sdang kreh ko ya i thaw wa i chna yung ha i thaw wa 30,000 sq. ft. yeiwa da mantre da ka (Newyearly) iwa da ktah yei yoh i la wa i khih i kreh yong ka.

Share this:
Previous

80% ha Nongrim Hills wa 99.7% ha R.R. Colony kiwa da dep yoh tika

Next

Phah khang u DC ya ki Coke Factory wym biang ki kot ki sla ha East Jaiñtia Hills