Ka yung bichaar ka West Jaiñtia Hills da pynmih hukum ko wow phah kset chi rta ya ki le ngut kiwa tynyap bru wa 7 snem ya uwi uwa slaitbor.
Ha ka hukum wa da pynmih ha ka 10-08-21, ya u Karlus Kanai da phah kset ya oo chi rta heiyatoh waka ujor wa da yoh na u Moris Lytep, Waheh Chnong ka Mootyrchiah Wah wa ha ka 21-07-2002 wa da chah tynyap u Marli Rabon ha u Karlus Kanai deiwa chah dung hapoh i yung u Wanpyntngen Sungoh heipor 12:30 i sngi.
Ya u Karlus Kanai da pynngat hapoh ka Section 302 ka IPC.
Ha ka 18-11-21 da phah kset chi rta ya u Albad Phawa deilang wa ka kuna wa T. 10,000 heiyatoh wa ka ujor ha ka 16-01-2006 wa da e da u Ashoka Lamin uwa na Khliehriat Nongjngi ha u In-Charge ka Nartiang PIC wa u Linki Pala uwa na Elaka Nongjngi da chah tynyap u ha u Albad Phawa ha Thadbamon Sookhlieh ha ka 15-01-2006 heipor 7:00 waje i miet.
Ya u Albad Phawa da pynngat ha ka Section 302 ka IPC.
Ha ka 25-11-21 da pynmih hukum yow phah kset chi rta ya u Ritulmon Suchiang deilang wa ka kuna kawa T. 30,000. Ini toh heiyatoh wa ka ujor wa da yoh ha ka 12-04-13 wa e da u Jawanki Shadap uwa naka chnong Mowkaiaw ha u In-Charge ka Raliang Outpost wa ha ka 11-04-13 heipor 8:30 i miet u Rilutmon Suchiang uwa na chnong Mukhap da tynyap u ya ka kurim u ka Sankini Lapasam ha chnong Mowkaiaw Pdeng Skur ha rood sarok.
Ya u Ritulmon Suchiang da pynngat hapoh ka Section 302 ka IPC.
Ha ka 25-11-21 da pynmih hukum yow phah kset 7 snem ya u Chanky Shadap deilang wa ka kuna kawa T. 10,000. Ini toh heiyatoh waka FIR wa da e ha ka 20-09-10 da kawi ka manbei ha Jowai Police Station wa ka khon ko kawa dang 14 snem i rta da chah slaitbor ko ha u Chanky Shadap ha iwi i khloo ha chnong Mukhla Umsuwe heipor 8:30 i miet heipor wa kani ka khynnah dang wan ko na yungmane.
Ya u Chanky Shadap da pynngat hapoh ka Section 376 ka IPC.
