Ynne ka sngi, ka KSU Jowai Unit da yoh ko wow ksoh ya ki baar jylla wa wan kamai pyrchah ya ka aiñ cha ka thaaiñ Jowai kiwa wan na West Bengal khlem em kiwon kiwon ki kot wa emkaam kam ki Labour License wa kiwi kiwi de ki kot wei kini toh kiwa lai luti dei miet wei heipor wa dang step iwa da pynkuslai wa kini ye ki wow leh ya kiwon kiwon ki kaam wa sih.
Ka seiñ da pyntip ko leh wa kini ki bru da pyrchang ki wow thied ya ki dkhot ka seiñ daka poisa iwa da pynchrai kylla ya ki dkhot ka seiñ.
Ya kini da wan wow kem da ki pulit yong ka Jowai Police Station kiwa rah ya ki cha thanat deilang wa ki dkhot ka seiñ wa kynthup ya u President, u Ewanmi Phawa, u General Secretary, u Leonard Dhar, u Publicity Secretary, u Nidapoi Shadap wa uwi u dkhot, u Ewanmi Kyndait.
Neiliang ka seiñ da pyntip ko wa ki dkhot ym em pyndem ki hakhmat yong ki pulit nadooh na yung krehkaam yong ka seiñ hadooh wa poi cha Police Station leh deiwa ong neibynta ka ri waka jaitbru wei ym e laad leh ya ki baar jylla wow wan ki pyrchah ya ka aiñ ha ka Bri U Ynñiawtrep Ynñiawskum.
Chooh chooh da ong wa ym kwah wow batai ya ki kaam yong ki pulit tangwa lada pteiñ ki wow rah ya ki dkhot ym yohsa wow batai yei kaam yong ki.
Neiliang ka seiñ da pyntip ko wa ym e laad ko wei da phah ko ya kini ki baar jylla wow liwan chnong ki neidaw wa wan ki pyrchah ya ka aiñ.
Ka seiñ da klam che ko wa u man ko kam u moochynthut yow khang ya ki baar jylla wa wan psiah pyrchah ya ka aiñ wow tooh ya ka kamai kajih ki tre jylla wei da maham leh ya kitu kiwa pyrchang wow thied ya ki dkhot wa kiwa yahkhmat ka seiñ da ka poisa.
