Ka sorkar Manipur da pynmih hukum ko ynnin ka sngi hadien wa da chem wa ha ki Facebook Group, ki WhatsApp Group wa kiwi de kam kini wa em ha ki rynsan Social Media kiwa boon toh kiwa pynchlur wow yaleh yoh laitlooid na ka ri, kiwa man pyrchah ya ka jylla, kiwa pynthut ya ka imlang sahlang wa kiwa pynsñiawphær jaitbru iwa da pynthut ya ka imlang sahlang hapoh ka jylla.
Da ong wa ha kini ki Group da em boon kiwa pynpoor ya ka khubor thok, kiwa klam pynmong wei ki wym toh u em ha ki rynsan paidbah wei ha kini ki jooh ki Group da embynta lang da kiwa kreh sorkar hadooh ki sahep sorkar kiwa da em dei mon yong ki hi wei em kiwa da chah pynpsiah iwa da mut wa da chimbynta lang ki ha ini waroh deiwa tip lane dei wym tip ki.
Chooh chooh da em leh kiwa kreh sorkar kiwa da emkti wow pynpoor khubor wei wow klam ha i rukom wym yahaap kam kiwa kreh sorkar.
Kamtæ da ong wa ini waroh da man ko pyrchah ya ka Rule 5 wa Rule 7 ka All India Services (Conduct) Rules, 1968 wa ki Rules 5,9, wa 11 ka Central Civil Services (Conduct) Rules, 1964 wei ye ki wow chah pynchitom.
Hajrong ini waroh da phah ya waroh kiwa kreh sorkar wow mih noh ki na kini ki Group hapoh 48 kynta itæ hadooh 6:00 waje i janmiet ka 12-08-22 wei lada ym leh ki ya ini daw chah pynchitom ki katkam ki kyndon ka aiñ.
