Jowai : Katkam ka yutip wa tikna wada yoh da ong wa ki bor District ka Moulvibazar kawa em hapoh Sylhet Division da e hukum ko yaki Khasi Pnar wa chong wasah haka chnong Nahar Punji ya kawa datip leh daki tre chnong kamka Nihar Punji kawa em hapoh ka Srimangal Upazila. Wow mih noh ki na kani ka chnong.
Ya kani ka hukum da pynmih ynnin ka 2 tarik Naiynru kawa da phah yaki Khasi -Pnar wachong chnong heini (Nahar Punji) yow mih noh ki neini hapoh 12 Naiynru (June) heiwa da kynnoh wa da chong ki haki thaw sorkar weiwa ki bor District da maham ki leh wa ladym leh katkam ka hukum daw wan leh ki yeini chirup waki bor pulit.
Da ong wa palat yaki 700 ngut ki Khasi Pnar ye ki u chah ktah heini i chah beh chnong kini ki bru na Nahar Punji.
Katkam ka yutip da kam wa kini ki Khasi – Pnar da chong dasah ki heini i chnong Nahar Punji nadooh warim wajah wei ki leh da su dan ki cha ka sorkar Bangladesh yow im u rep ha ini i thaw.
Kini ki bru Khasi – Pnar man ki kiwa im nei rep pathi, ki soh ki pe wa kiwi kiwi ha ini i chnong nadooh warim wajah.
Wei hajan kani ka chnong em leh ki thaw rep slacha kawa heh bha wa pyllai daka Nahar Tea Estate kawa sdang ha u snem 1964 heiwa yei thaw da chim wai ko na ka sorkar Bangladesh.
Tangwa katni won da kam kini ki tre kpær slacha wa ka Nahar 1 Khasi Punji wa ka Nahar 2 Khasi Punji leh man ki chibynta wei i thaw wada chim wai kani ka company naka sorkar Bangladesh kamtæ ki bor district leh da kyrchaan yeini wada kam kani ka company wei da phah leh ya waroh ki Khasi, Pnar kamjooh leh yaki Garo wa sah ha kini ki thaw yow kyrriah noh ki na ini i thaw hapoh ka 12 tarik uni u bnai wei lada ym leh ki yeini daw pynemkaam dei bor chirup wa ki pulit yow kyrriah ki na ki chnong yong ki.
Kini ki Khasi, Pnar da kam ki leh wada chong dasah ki heini nadooh chwa u yoh laitlooid ka ri India, iwa mut chwa wow phiah yaka India waka Bangladesh daki pharæng.
Neiliang u wyrta u pyntip chooh u hei yatoh weini.
Discussion about this post