Ka Meghalaya High Court da phah Notice ko cha ka North-Eastern Hill University (NEHU) hadien wa yaleh mukotduma da u kyrtong ka Voice of the People Party (VPP) uwa man leh kam u Professor ka NEHU, u Batskhem Myrboh, uwa da paan ya ka No Objection Certificate (NOC) yow ye u yaleh ya ka Shillong Lok Sabha Bye Election.
Hawa chong bichaar ya kani ka mukotduma da u Justice HS Thangkhiew ha ka 21 tarik, da phah ya ka Notice cha ka NEHU hajrong ini i kaam.
U Batskem da lai u cha ka High Court deiwa pynbaad wa ka NEHU da pynslem ko wow leh yeiwa emkaam ya ka Application u wa paan bor u yow yaleh ya ka Bye Election. Kam wow pynkynmoo wa u MP warim ka Shillong uwa da khlaad noh, u Ricky AJ Syngkon leh man u kam u Professor ka NEHU hachwa wow yaleh Election.
Neiliang u Batskem da yasaaid u wa da pyndep u ya ka Probation kawa ar snem ha NEHU wei ym ye wow khang oo, tangwa ka NEHU ym pu em pyntikna ko yeini wa kreh namo ka Service wei ym pu em leh e NOC.
U Batskem da booh u ya ka Application ha ka 5 tarik u March 2026 ha u Pro Vice-Chancellor ka NEHU Shillong Campus yow paan bor u yaleh Election wei hadien ini da booh sa kawi ka Application ha u Vice-Chancellor ha ka 10 tarik u April deiwa paan leh ya ka NOC yow chah ya oo wow man u kam u kyrtong heiwa ha ka 27 tarik u April da phah chithi biang u yow pynkynmoo yeini.
Ha ka 4 tarik uni u bnai, u Pro VC da e jubab u wa katkam ka NEHU Regulation Rule RE-05, du ka Executive Council kawa embor wow e bor ya kiwa sikai ha NEHU u yaleh Election MP næ MLA.
Ha ka mukotduma da ong wa u Batskem da pyndep u ya ka 2 Year Probation ha u September 2025 wei da toh u man u kam uwa kreh wa pura tangwa i pyrtuid u ym em mih i ha ka thup kiwa sikai kiwa man kam kiwa pura, kamtæ da thoh u cha u VC tangwa ym em pynbait yeini hadooh kattæ.
Ya kani ka mukotduma daw chong bichaar biang ha ka 4 tarik u bnai wow wan.
Discussion about this post