U Montri Rangbah ka jylla Meghalaya, u Conrad Kongal Sangma da dawa u na uwa yahkhmat ka Trinamool Congress (TMC), u Kirti Azad, kamjooh leh na kiwa yahkhmat ka Trinamool Congress ha kani ka jylla wa kani ka seiñ toh u paanmaap ki na ki paidbah ka jylla.
Hawa klam wa ki laad pathai khubor ynne ka sngi, u Conrad uwa man leh u President waheh dooh ka NPP, da ong u wa ini i booh uni uwa yahkhmat ka TMC ha Twitter man ko kawa ym ye u pdiang neibhah da pyndooh burom wei yoobeiñ ya ki paidbah ka jylla khamtam ya ki Khasi.
Da ong u wa ini i thoh uni uwa yah ka TMC ha Twitter toh iwa khlem da pyrkhat, wei toh u paanmaap u na ki paidbah ka jylla neibhah da pyndooh burom ya ki riam tynre yong kiwa chong chnong kani ka jylla.
Kam wow kdaw heini, u Azad da booh u yei dur yong u Prime Minister Modi uwa da wan cha Shillong ha ka 18 tarik uni u bnai, heiwa da klam kyndeh u yei riam tynre yong kiwa chong chnong ka Meghalaya kiwa da pynsap ya u Modi ha katai ka sngi.
Hajrong ini iwa da thoh u Azad, neiliang ka BJP deilang leh wa u Montri Rangbah ka Assam, u Himanta Biswa Sarma wa u Montri Rangbah ka Arunachal Pradesh, u Pema Khandu leh da beiñ jor ki ya u Azad uwa da pyndam noh ya ini iwa da thoh u ha Twitter wei da pynmih u leh yei pynche wa ym em mut u wow pyndooh burom yei riam tynre ki paidbah ka Meghalaya tangwa yaroh u yei stat u Prime Minister u jied riam.
Tangwa i dur wa booh u Azad toh deiwa rah (Photoshop) yei riam u Modi dep te booh ha iwi i dur ka kynthai deiwa ong wa ye u thied ya ini i riam.
