theme-sticky-logo-alt
theme-logo-alt

Phah pynchitom ka High Court ya ki bru sorkar wa e laad yei tih mooyong pyrchah ya ka aiñ

Heiyatoh waka mukotduma wa leh hi da ka Meghalaya High Court wa chong bichaar da ki le nut kiwa bichaar namo ki Judge wa kyntup ya u Chief Justice, u Justice Sanjib Banerjee, u Justice H.S. Thangkhiew wa u Justice W. Diengdoh da pynsñiaw ki yei wym hun yeiwa da leh ka sorkar heiyatoh wow khanglaad yei tih mooyong pyrchah ya ka aiñ.

Hawa chong bichaar biang ya kani ka mukotduma ynne ka sngi, da bichaar ya ka bui (Report) wa e da ka Chief Secretary ha ka 1 tarik uni u bnai kawa da batai yeiwa da leh yow pynkrehkaam ya iwa da phah da ka Supreme Court deilang waka NGT heiwa da khana wa da dep wow kem ya palat 3500 tylli ki Truck katkam ka hukum ka NGT ha ka 05-01-19 tangwa neiliang u Advocate-General uwa da yasait neibynta ka sorkar ym ye u khana chaphang iwi pa iwi.

Neiliang ka yung bichaar da ong ko wa ym em che bha wa ha kani ka Report da leh lut ya waroh iwa da phah da ka Supreme Court waka NGT tangwa da yoo wa i por wa da booh wow dai lilam ya u mooyong wa tih pyrchah ya ka aiñ da ka Coal India Limited ym em leh ya ki.

Wei ini da wanrah ko yei tih mooyong pyrchah ya ka aiñ heiwa ya uni u moo wa dang tih thymme da kam kam uwa da dep tih chwa wei yeini ym ye u leh lada ym krehkaam lang ki bor District.

Ka yung bichaar leh da ong ko wa kani ka Report wa da e da ka Chief Secretary ym em khana ko kammon da pynchitom ya kitu ki sahep sorkar, ki bru sorkar wa emkti ha ini i kaam kiwa leh thlah, kiwa da e laad, kiwa da ye leh wow yarap yow leh ya ini i kaam. Kamtæ toh u em i kitkhlieh heiyatoh wa ini yow phah ya ka khubor wa che cha kitu kiwa toh u pait ya ini kaam lada pteiñ ini i jooh hapoh i pait yong ki.

Da ong leh wa i thong ymtoh wow pait deiwa thymme ya iwa dadep ka Supreme Court wow pynmih hukum kamjooh ka NGT. Iwa toh u leh katni toh yow pyntikna wa waroh iwa da phah da ka Supreme Court waka NGT da bood wei da pynkrehkaam ki wei ini i tlot wei i wym ye wow leh yeini ye u man wym pu em wa pyntip cha ka Supreme Court lane ka NGT.

Kamtæ da ong wa da toh u chna biang ya ka Committee kam kawa dadep chna da ka NGT heiwa ki dkhot warim kiwa da dep chem ya ini waroh daw ye ki wow yarap kammon wow chem yeiwa tlot bor ki bor sorkar wow leh.

Hajrong ini da e por ar tayaw chwa wow chong bichaar biang yeini wei ha ini i por ka sorkar toh u leh ko katwa ye yow bood ya ki kyndon wei wow kdoh u khoom ya waroh ini i kaam tih mooyong hapoh ka jylla yow pyntikna leh wym ktah de ka rymaw deiwa puræ bniah leh yei chah ktah, u pynchlur yei tih mooyong katkam ka aiñ, u pynku yei yoh nong ka sorkar yow yoh kreh leh ki bru.

Ya kani ka mukotduma daw bichaar biang ha ka 19-04-22.

Share this:
Previous

Khut sñiawbha ka Seiñ Raij Tuber cha ka Chaad Suk-Kara 2022

Next

Khlaad noh u Ma Deling Rymbai