Ka seiñ Khooid Yaka Wah Myntdu (KYWM) ynne ka sngi da lai yachem ki wa ka CEO yong ka Jowai Municipal Board (JMB), ka B. Blah wei da kyrpaad yaka u pynchitom ya kiwa tyngkheiñ yaki kyndon ka NGT, kamjooh leh u pynchitom katkam ka kyndon Section 144 CrPC wada pynkrehkaam neibynta i bha i miat yong ka wah Myntdu.
Ini i lai ujor yong ki toh hadien wa yoo ki yei kaam pyrchah aiñ wa ktah yaka wah Myntdu, kamjooh leh i noh jhep cha ki chariñ yong kani ka wah.
Hajrong ini neiliang ka CEO leh da khut ko i yakrehlang yong ki khnang yow ye pynman kaam neibynta i bha i miat yong ka wah.
U K.L. Pariat, President KYWM ong haroh u wa katkam ka yutip yong ki, ka Jowai Municipal Board (JMB) chirup waka Meghalaya Urban Development Agency (MUDA) ym slem de daw chna ki ka thaw pynkhooid (Treatment Area) haki bynta yong ki liar ki dooid wa kai chaka wah Myntdu, khnang wa ka um wa kai ym wanrah de ko i jakhlia yaka Myntdu kawa psa umdih yaka chnong Jowai, wei ya ini i kaam ong u da ekti ki haka Consultant Agency yong ki.
Hajrong ini i thmu neiliang yong ka KYWM ong ki wa pdiang hi ki deiwa kyrpaad leh u chna bha deiwa em i kitkhlieh heitæ i rukom wa ki Plastic, ki jhep næ kiwon kiwon ki bynta wa ktah yaka wah Myntdu wymtoh de u yohlaad ki u kai cha Myntdu.
Heiyatoh wa ki jhep wa lang won, u K.L. Pariat ong u wa da e yumut ki u pynkrehkaam ya ki wakreh ka JMB neibynta wow e ki i pynsñiawthooh paidbah hajrong kammon u pynyakhlaad yei jhep wa pyut wa ki wym pyut khnang wa kiwa chong chnong leh u ye ki wow leh iwa bha tam.
