Ka sorkar Meghalaya hei yachem ki Montri sorkar ynne da mynjur ki wow khang noh ya ka yukheiñ yukdiah ka Saubhagya wa ka Deen Dayal Upadhyaya Gram Jyoti Yojana (DDUGJY) Scheme deiwa phah wow pynchitom ya kitu ki Contractor ki wym em pyndep yei kreh ka chongdor ₹54 lak.
Kini ki Scheme toh kiwa dei thmu wow pynpoi bordiñ cha waroh ki manyung wei da man ki kiwi sahkut neidaw wa em boon ki takit wei wow pynsakhit yei kreh wa dadep leh.
U Montri Rangbah ka jylla, u Conrad K Sangma da ong u wa ini i khang noh ya kani ka yukheiñ yukdiah toh hadien wa da mynjur ya ka Final Verification Report wa da e da ka Meghalaya Power Distribution Corporation Limited (MePDCL).
“Hadien wa dadep wow leh yei pynsakhit da boonsien, ka MePDCL da chem ko nei ₹96 klur i kreh, da em ₹54 lak ki wym em pyndep,” da ong u Conrad hawa yaklam wa kiwa thoh khubor. Da ong u leh wym su ya kini ki kreh wym em pyndep wei kitu ki Contractor wa pynkreh yeini daw pynchitom ki neibhah da chah ktah kamwa 30-40 tylli ki chnong wa em cha palatsor.
Da pynche u leh wa kitu ki kreh wa da ye u pyndep daw pynlait ka poisa cha ki Contractor neibynta kitu donhi ki bynta wa dadep kreh.
Da pynsñiaw u leh yei kyrmen wa manda pynkreh ya ka Revamped Distribution Sector Scheme (RDSS) da ka sorkar India daw ye wow pynpoi bordiñ cha kiwa boon ki yung wa em ha ki chnong wa em cha palatsor hapoh ka jylla.
Discussion about this post