Ka Supreme Court ka ri India da pdiang ko yeiwa booh kyrpaad (Appeals) da u Bernard Lyngdoh Phawa wa u Boni Lyngdoh Phawa, deiwa pyndam noh ya ka hukum ka High Court ka Meghalaya kawa da phah kset ki waroh chi rta heiyatoh wa i chah pynyap uwi ha u snem 2006.
Ini toh iwa jia chah pynyap uwa lai puræ Mass Communication ka St. Anthony’s College Shillong, uwa tip kam u Biplab Das (21 snem) heiwa da wiar u ha ka 18-02-2006.
Yei metyap u da chem won hadien 3 sngi na thaaiñ Mawlai–Mawroh heiwa da em wa tlep ki, wei da tih biang ki hadien kam chibynta ka takit.
Ha itai i por da suba wa u Biplab da chah rahbor u pyn ha ki bru wa tipmit u yow dawa poisa na ka yung ka sem u tangwa hadien won da suba wa chah pynyap u pyn ha kini ki bru wa rahbor oo.
Yei thaw wa tlep ya u Biplab leh da kam wa lai pynyoo da uwi na kini kiwa chah pynbaad.
Ka yung bichaar (Trial Court) ym em rai pynrem ko ya kini kiwa chah pynbaad deiwa ong wym em biang ka sabut wow ong wa pynyap bru ki. Tangwa hadien won yeini da pynkylla da ka High Court kawa da rai pynrem wa emkti ki wow pynyap bru wei kamjooh wow pynwiar ya ki sabut.
Ka Supreme Court won da ong ko wa neiliang kiwa yaleh ya ka mukotduma ym em ye ki wow pynyoo deiwa biang ki sabut tangwa da ki sabut wa antaad donhi yeiwa jia. Deiwa kdaw leh ya i wym em biang ka takit, kamjooh ki sabut hadooh kammon da chem ya ka tiar wa pynemkaam yow pynyap, kammon da phla, ki kha mynsoo katkam ka Medical Report phær ko leh yeiwa da ong hapoh ka mukutduma.
Da ini waroh, ka yung bichaar da ong ko wa nyngkong leh ym em rai pynrem ya ki, wei ymtoh u pynkylla lada ym chem ya iwon iwon iwa thymme. Kamtæ da phah wow pynlait ya kini ki ar ngut wei lada em ki Bail Bonds leh wow pyndam noh ki.
Discussion about this post