Ka Meghalaya High Court ynne ka sngi da pynmih hukum ko wow sangeh chwa waroh ki thung kreh hapoh ka jylla kat wym pu pynbiang ya ka Roster System ya waroh ki kreh wa lait hadien wa kheiñ ya ka Reservation Policy, wei i thung kreh neini chakhmat toh katam ka bhah wa da booh hapoh ka Reservation Policy.
Ya kani ka mukotduma wa da chong bichaar da u Chief Justice, u Justice Sanjib Banerjee wa u Justice W. Diengdoh toh kawa yaleh da ka Zanera R. Marak pyrchah ya ka sorkar Meghalaya.
Ka yung bichaar da ong ko wa wot hadien 50 snem wa da em ka jylla wei la 50 snem i booh bhah (Reservation) neibynta i kreh hapoh ka jylla neibynta ki kreh sorkar, ym em Roster System hadooh katni kawa pynyoo iwon i kreh wa da booh bhah ya kiwon.
Da ong wa dei wym em kani ka Roster System da e laad ko wow leh chiliang hawa thung kreh wei hadooh wow chim kabu ya ki kyndon thung kreh. Kamtæ waroh ki thung kreh kiwa neini chakhmat toh u sangeh chwa kat wym pu pynkrehkaam ya ka Roster System. Wei ya kani ka Roster System toh u kheiñ hadien wa dep kheiñ katkam i bhah wa da booh hapoh ka Reservation.
Ini u krehkaam ko ha waroh ki chnat sorkar wa ha kiwon kiwon ki thaw wa ka Reservation Policy krehkaam ko.
Da phah leh ya ka hukum cha ka Chief Secretary yow khana ko iyi wa da leh heiyatoh wa ini wei ya kani ka mukotduma u kheiñ noh kam ka Suo Motu Public Interest Litigation namo kawa da chim wow yaleh da ka yung bichaar hi.
Neiliang ki muktiar ka sorkar da ong ki wa ka Reservation Policy da pynkrehkaam hawa khut yaleh kreh wei hawa thung kreh heiyatoh wa i kaam wa da yaleh mukotduma heiwa da khut yaleh kreh ha u 2006 wei da pyndep ha u 2009 tangwa ka yung bichaar da ong ko wa ha ka Advertisement ym em ong ko katwon tylli ki kreh toh kiwa neibynta ki Reserved Candidate wa katwon ya kiwi tawon.
Hawa kylli bniah ka yung bichaar da chem wa ini i jooh da leh hawa thung kreh hapoh ka High Court leh kamjooh nadooh wa sdang ka High Court iwa la 10 snem kattu. Wei u muktiar ka sorkar da pyntip u leh wa ym em pynkhreh kammon wow thung kreh lada lait neini chakhmat wei kammon u yabhah manda thung kreh biang sa chisien.
U Advocate-General ka jylla da pdiang u wa ym ye wow pynkrehkaam ya ka Reservation khlem da em ka Roster System.
Da phah leh ya ka sorkar jylla wow e jubab ko heiyatoh kammon da thung kreh ya ki 12 ngut wa yatoh wa kani ka mukotduma heiwa kammon da thung da kiwi heithaw yong i bhah yong kiwi wei yeini hap jubab hapoh chi tayaw.
Ya kani ka mukotduma daw chong bichaar biang ha ka 20-04-22.
