Ka Meghalaya High Court ynne ka sngi da chong bichaar ko ya ka mukotduma PIL wa da yaleh da u Ibahunlang Nongkynrih pyrchah ya ka sorkar Meghalaya yei pynkrehkaam ya ka aiñ Meghalaya Residents Safety & Security Act, 2016 heiwa ka PIL da kylli ko wa hadooh katwon man kani ka aiñ kawa ye u pynkrehkaam wei heijooh i por kawa da khor palat hadooh wow ban beiñ ya ki bru.
Ya ka PIL da chong bichaar da u Justice Sanjib Banerjee, Chief Justice wa u Justice W. Diengdoh kiwa da ong wa ka sorkar jylla da kdaw ko ya ka Article 19(5) ka riti synchaar, tangwa ki daw wa da pynkrehkaam ya kani ka aiñ ym em kdaw ya ki hapoh kani ka aiñ. Wei ym em da leh leh ya ini hapoh ka Section 20 kani ka aiñ wow kdaw kiwa kiwa embor wow chna kyndon.
Kiwa yaleh PIL da ong ki leh wa da booh boon ki Check Gate neibynta ki bru wa psiah chapoh ka jylla khlem da booh leh ki kyndon wow pdiang lane wow kyntait ya kiwa psiah chapoh ka jylla kiwa man leh ki tre ri wei kini ki Check-Post toh kiwa booh hi heh khlem da pyrkhat.
Neidaw wa u muktiar ka sorkar jylla da paan por u yow wanrah ya ki kyndon kiwa toh u thap hapoh ka aiñ da ieh wa ini i kaam u neh i kattu katni por.
Kamtæ da ong wa katkam wa man katni, kani ka aiñ neidaw wym em ko ya ki kyndon hawa psiah wa i lai i wan ki tre ri chapoh ka jylla, kamtæ ym pu toh u pynkrehkaam ka.
Ya kani ka mukotduma daw chong bichaar biang ha ka 02-02-22.
