Ka Meghalaya High Court da booh ko da ka Status Quo namo i burom markylliang heiyatoh wa i tympra ya i yung yongrim (Heritage Property), i Bidhan Bhavan wa tip leh kam i Roy Villa wa em ha Laban, Shillong.
Ya ini i yung da chna chwa u 1923 da u Dr. Bidhan Chandra Roy, uwa man leh kam u Chief Minister warim ka West Bengal, wei jooh man ko leh kam ka thaw sah Ly’ur ka yung ka sem yong oo wei katni man ko kam ka Circuit House.
Ka Division Bench ka High Court wa kynthup ya u Justice Hamarsan Singh Thangkhiew wa u Justice Biswadeep Bhattacharjee da phah ko ya kani ka mukotduma cha ka PIL Bench u Chief Justice heiwa da rai wow pynneh ya ka kat hadooh wow chong bichaar seisien.
Ya kani ka mukotduma da pynman kam ka Public Interest Litigation (PIL) ha uni u bnai lyngba ka chithi cha u Chief Justice Soumen Sen wa khana yei man kyrpang ini i yung wei i rukom pynwandur (Architectural Importance).
Neiliang ka sorkar da e ko ya ka Affidavit, heiwa u Advocate General da ong u wa daw e ya ki yurim wa ki thoh ki tar katkam wa chem heiyatoh wa ini i yung wei kammon da pynman ya ka kam ka Circuit House.
Neiliang u Amicus Curiae, u S. Chakrawarty da ong u wa daw e u ya ka Affidavit hadien wa yoh ya ka jubab na ka sorkar.
Discussion about this post