theme-sticky-logo-alt
theme-logo-alt

Phla kiwa hayung u Ramesh wa ki ym toh ki yong Dkhar

Advertisement ad1

Hadien i chem yong ka Seiñ Kur Dkhar, East Jaiñtia Hills heiyatoh wei i pynemkaam bakla u Ramesh Dkhar wa kiwa hayung hasem yong oo waroh ya ka kur Dkhar kam ka kur yong ki hanla ym toh ki na ka kur Dkhar paka leh, ka Seiñ Kur Dkhar da khut hajir khaddooh ko ya kiwa hayung hasem u Ramesh Dkhar ynne ka sngi ha ka yung krehkaam yong ka Seiñ Kur Dkhar, wei hakhmat kiwa yahkhmat yong ka Seiñ Kur Dkhar da kular ki wow pyndooh pyndam noh chisyndon yei pynemkaam yei kur Dkhar nei pyrtuid yong ki waroh.

Ka Seiñ Kur Dkhar, East Jaiñtia Hill lyngba ka wyrta kawa da pynlait da u President yong ka, u Teras Dkhar, kwah ko wow pynche cha ki paidbah wa u Ramesh Dkhar wa kiwa hayung hasem yong oo waroh ym toh ki yong Dkhar paka, tangwa da pynemkaam bakla ki ya ka kur Dkhar kam ka kur yong ki hadien wa da wan chong chnong ki na Silchar, Assam cha ka chnong Tongseng, East Jaiñtia Hills weiwa toh nadooh u snem 2000 wa da sdang ki u pynemkaam bakla ya ka kur Dkhar kam ka kur yong ki khlem da yoh bor na ka kur Dkhar iwa man pyrchah ya ka riti dustur wa ya ka hok kynti kheiñ kur kheiñ jait yong ka kur Dkhar hi waroh kawi katkam wa da sikai wei e pateiñ na ki manchwa longchwa yong ka kur Dkhar.

Advertisement ad1

Ym toh du kattæ, u pynsakhiat chooh chooh yeini i wym em i yatoh yong u Ramesh Dkhar wa kiwa hayung hasem yong oo waroh hi wa ka kur Dkhar, heiwa uwi u payu tre yong u Ramesh Dkhar da ya chongkha u wa ka wi ka kynthai yong Dkhar paka hi, kawa na ka chnong Nongsning, East Jaiñtia Hills wei wa da em ki katni la 5 ngut ki khon.

Heijooh i por, heini i khut hajir yong ka Seiñ Kur Dkhar ya kiwa hayung hasem yong u Ramesh Dkhar hawa da takit chooh chooh deiwa rap bniah hajrong ini i pynemkaam bakla yong ki ya ka kur Dkhar kam ka kur yong ki, da phla ki hakhmat kiwa yahkhmat yong ka Seiñ Kur Dkhar wa ki ym toh ki yong Dkhar paka wei ym toh ki na ka doh ka snaam wa sakhiat yong ka kur yong Dkhar. Wei da phla haroh ki wa da pynemkaam pyrchah aiñ wei bakla sakhiat ki waroh chi yung ya ka kur Dkhar deiwa pynemkaam ya ka kur Dkhar wei yeini da sakhi wot ha ki dur Election yong ki wei ha kiwi tawan ki kot ki sla wa pynemkaam ki. Da ong haroh ki wa da leh ki yeini du kat neibynta i myntoi samen yong ki wei yong ka yung ka sem yong ki.

Katda kamtæ, hajrong ini i pynemkaam bakla yong u Ramesh Dkhar wa kiwa ha yung hasem yong oo ya ka kur Dkhar, ka Seiñ Kur Dkhar, East Jaiñtia Hills hadien wa yaklam sñiawthooh yumut ko wa ki ynne ka sngi, dei mon yong yong ki hi da kyrpaad wei kular ki hakhmat kiwa yahkhmat yong ka Seiñ Kur Dkhar wow e por ya ki hapoh le bnai yow pyndooh pyndam noh ki chisyndon waroh kam ka yung ka sem yei pynemkaam ya ka kur Dkhar, heiwa ka Seiñ Kur Dkhar leh da pdiang sñiawbha ko yeini i kyrpaad wei i kular yong ki ha ryngkat ki kyndon wa da booh pynda ki hi hakhmat yong ka Seiñ Kur Dkhar wa lada jia wym leh ki yeiwa da kular ki hakhmat ka Seiñ Kur Dkhar, ka Seiñ Kur Dkhar ye ko wow chim da kawon kawon ka luti kawa khor pyrchah ya ki waroh kam ka yung ka sem.

Kamtæ neidaw yong itai i kular yong kiwa hayung hasem yong u Ramesh Dkhar ya ka Seiñ Kur Dkhar, ka Seiñ Kur Dkhar kattæ chooh ym pu kwah ko u lai da ka luti kawa khor pyrchah ya kiwa hayung hasem yong u Ramesh Dkhar tangwa lada ym bien ki wow pyndep yeiwa da kular ki, ka Seiñ Kur Dkhar daw chim ko da ka luti kawa khor bha pyrchah ya kiwa hayung hasem yong u Ramesh Dkhar.

Puræ leh: U Ramesh Dkhar ym toh uwa chong chnong ka Mihmyntdu

Share this:
Previous

Pynchlur u DC wow yaleh ya ki Scholarship

Next

Chirup wa ka pyrthai kynmoo warom ka MBS&G ya ka International Day of Peace