Jowai: I pynim pynneh pynsah ya ka niam, rukom, dustur wa yah wa tyoor ki warim, manchwa longchwa toh man i iwa emkaam bha ha kani ka juk wa che wa stat katni, kamtæ hajrong kani ka yurim ki khon khynroo khyllood ka Niamtre wa em hapoh ka chnong Chilliangraij, dei khia pyrkhat chim ki wow saiñ, u sdang ya ka Shlem Sikai kawa man chisien chitayaw ha Yungwalieh ka chnong.
Ha uni u snem kani ka chlem sikai wa em hei pait i pynlai ki khon khynroo khyllood ka Chilliangraij da kynjoh ko cha u Moomer wa niaw wei kam ka dak i lehwarom ya kani ka Lyngkhooh Snem da em i lehwarom kyrpang ha Yungwalieh ha kani ka sngi Mulong 22 tarik u Naikhynde heiwa ha pyrdi i wan chimbynta chongchit ki khon ka Niamtre na kiwi ki dong ki chnat u EMH Passah da man u kam u kongsan katwa u waheh Dawmanchuh Lamar da man u kam u symbood kongsan hei sakhilang ki waheh wasian, manbei manpa, wa ki khynroo khyllood.
Ka Jukiru Shylla wa u Damanhao Rngad ha kani ka janmiet da man ki kam kiwa pynlai heiwa da kdar luti leh ya ki bynta wa chakhmat deiwa yoh yei Ngoohblai Ngooh Syiem na ka Dakawanhai War, i puræ kyntien kular da waroh hei yahkhmat ka Daimon Dkhar wa ka Daiwaka Dkhar, i klam ya ki kyntien pdiang burom da ka Waisakani Pde, i khana pynsñiaw won yei krehkaam kyllum ka Committee da pynsñiaw da ka Rikika Pde katwa hawa kut yong kani ka yachemlang ka Risa Lanong da e ko ki kyntien sñiawngooh.
U Damehiwot Pde, waheh chnong ka Chilliangraij hei e kyntien ha khap u waboon walang da yaroh u ya kiwa yahkhmat kani ka Committee kiwa da kitkhia sakhiat wow tyoor luti ya ki khon ka chnong heiliang i tip niam tip rukom wei burom akor. Ong chooh chooh u leh ha kani ka pyrthai wa che wa stat katni toh man iwa emkaam bha wow ksoh u kune yei man kyrpang ka jaitbru wei wow tip i u leh ya ka niam ka rukom dustur yong-i dahi wei da e mynsien u leh ya ki khon khynroo khyllood u man ki kiwa em i kitkhilieh ya ki kaam niam nadooh na yung na sem hadooh ha Raij ha chnong.
Chooh chooh da pynkyrpang ya kani ka Lyngkhooh Snem deiwa yoh leh u ap u sñiaw yei klam i kappe yong uwi na ki diahkhian u Budwanmi Dkhar uwa da klam pynsñiaw hajrong ka phang wa ong ki khynnah ki symbe ka pateiñ, heiwa da pynwandur u yei klam yong o, deiwa khut kysru kyntu ya ki para khynnah wow man kiwa tip u maya ya ka niam wa da kha lang wei man leh kiwa tip u burom ya ka Bei-U Pa wa ya ki waheh wasian.
U Dawmanchuh Lamar da ong u wa man iyi iyi iwa yoosuk u sakhi wei sñiawsuk u ap wa kani ka Lyngkhooh Snem yong ka Khynroo-Khyllood Niamtre Chilliangraij man ko kawa rap kyrpang hawa nujor wa ki snem kiwa da lai heiwa da yoh u sakhi wa da mih ki symbe yong ka pateiñ iwa pynyoo ka sakhi sabut wa em ka mynried wache wa tyrchaaiñ ya ka niam ka rukom hapoh ka Raij ka Chnong. Neitæ chooh chooh tawar u leh yow dak kylli ha khap u waboon walang dei wa ong, Yi won i kaamram kam ki waheh heiyatoh wa kini ki symbe yong ka pateiñ, toh mo wow hun du katni donhi namo dang toh chooh wow tyoor luti i ya ki.
U EMH Passah hei e kyntien kam u kongsan, iwa kyrpang kdar u wow klam yei miat i bha ki khon khynroo khyllood deiwa ong, kynmoo kam ki khon khynroo-khyllood kiwa man ka mynried yong ka yung ka sem, ka chnong ka thaw, ka ri wa ka jaitbru toh u man phi kiwa toh sneiñ toh kroo wei tipbru tipblai na yung ha lait.
Hajrong i klam, i kappe kini ki waheh wasian ha kani ka sngi wow pynchoh pynwyrngia, pynphooh pynphieñ chooh chooh ya kani ka Lyngkhooh Snem da em ki chaad, ki rwai sur tynre wa yoosuk, yoochongkun wa da chimbynta da ki khon ka chnong Chilliangraij wa kamjooh leh na ki khon khynroo khyllood ka Seiñraij.
Discussion about this post