Phooh phieñ ka Behdieñkhlam 2025 ka Raij Ialong | Rs. 10 lak yoh yarap yow chna ya ka yung Seiñraij

Ka Behdieñkhlam 2025 ka Raij Ialong ha uni u snem da poi ko cha wakut ynne ha Aitnar heiwa da wan sakhi ya ka da u Symbood Montri Rangbah ka jylla, u Sniawbhalang Dhar, u MLA ka Jowai, u Wailadmiki Shylla, u MLA ka Umroi, u Damanbait Lamare, u Dolloi ka Elaka Jowai, u Puramon Kynjing wa kiwi kiwi.

Ha kani ka sngi da wanrah hadooh 13 tylli ki rong na ki dong ki kyntoit waphær waphær hapoh ka chnong Ialong wa kamjooh na Wahiajer wa na Nongkyllep kiwa man ki khon ka Raij Ialong.

Ki bynta ka lehniam Behdieñkhlam ka Raij Ialong toh kawa da sdang la chi tayaaw tam wei da pynkut ya ka ynne ka sngi.

Ha Aitnar da em ka yalang wa tbian wa pynlai da u President ka Seiñraij Ialong, u P. Shylla.

U Wailadmiki hawa e i klam wa tbian da khana u wa ki kaam pynroi hapoh ka chnong Ialong da man ki kiwa lai chaaid chaaid wei da e kti u leh ya ka Work Order wow kreh ya i yung ka Seiñraij Ialong wa Rs. 10 lak.

Neiliang u Sniawbhalang da e khublei u ya u Wailadmiki wa em u i bahkhlieh ya ka Constituency deilang ka jylla weiwa ki kaam pynroi da chynna wa wanrah u ki hapoh ka chnong ka thaw yeiwa da sakhi ya ki kreh wa lai bait katni.

Da ong u wa ha u 2026 daw yoo wa ka Aitnar daw miat bha ko deiwa kyntu ya waroh wow man kiwa yaichah chipor.

Chooh chooh da e khublei Behdieñkhlam u ya waroh wei da ong u wa ka Behdieñkhlam man ko ka lehniam wa phooh dooh hapoh ka jylla Meghalaya.

Hadien wa da pynhiar ya ki rong ha Aitnar da em ka Taan Bhang wei ka Tyngkheiñ Bhang kawa mut yow pyn-eh-nasib ya ki khon ka Raij.

Manda dep na Aitnar ki Wasan da pyndep won ki ya ka Kñia Wah Bhang ha Yung Duwan wa em ha Khlooblai ka Raij Ialong.

Ynne hapyrdi u slap ka Behdieñkhlam ka Raij Ialong da man ko kawa jop wei kawa phooh wa phieñ.