Ka Seiñ Raij Mukhla da pynman ko yaka Chaad Sukra ynnin ka 2 tarik ha Mukhla Nongrim kawa da wan wai da u Womly Chyrmang, President ka Seiñ Kyntu Seiñ Raij 12 Dolloi kam u kongsan deiwa sakhilang u P. Kynjing, Dolloi Elaka Jowai, u Wailadmiki Shylla, MLA 2 Jowai Constituency wa kiwi kiwi de ki waheh na ki chnat Seiñ Raij waphær waphær.
Ha kani ka Chaad Sukra da wan wow ya chimbynta hadooh 21 tylli ki dhab chaad tynre na ki khon khynroo ka Seiñ Raij Mukhla na ki kyntoit waphær waphær wei kamjooh leh da yoh ya i chaad tynre na ki khon khynroo ka Seiñ Raij Nartiang.
Kamtæ ka Seiñ Raij Mukhla da e khublei ko ya waroh kiwa wa ya chimbynta ha kani ka sngi, da e khublei leh ya u kongsan uwa wan wai ya kani ka Chaad Sukra, ha i jooh i por ka Seiñ Raij Mukhla da e khublei ko ya u Pa Dolloi ka Elaka Jowai uwa da wan wow ya emlang, da e khublei leh ya u S.K. Sunn, MLA Mawphlang hanla ym yoh u wow ya embynta lang tangwa da i mynsien wa kyllooid da e yarap u yaka Seiñ Raij Mukhla, kamjooh ya u Wailadmiki Shylla uwa da e yarap ya ka Seiñ Raij da ka Pandal, ki tanghæng namo ka Sound System wa kiwi kiwi de kiwa emkaam ha kani ka sngi Chaad Sukra.
Ya ka yalang da pynlai da u President ka Seiñ Raij Mukhla u Wellborn Lyngdoh wei da yoh yei klam na u Tiplem Sumer, General Secretary ka Seiñ Raij, u Wailadmiki Shylla, u P. Kynjing wei khaddooh da yoh yei sneiñ kyntu na u kongsan ha kani ka sngi wa ki kyntien khublei na u Standbyme Sari uwa man u Auditor ka Seiñ Raij Mukhla.
