Ka Chaad Sukra ka Seiñ Raij Mukhla dapoi ko cha wakut ynnin ka sngi heiwa da wan wow sakhilang da ki khon ka Seiñ Raij Mukha, ka MLA ka Sutnga-Saipung, ka Santa Mary Shylla kam ka kongsan katwa u MLA ka Jowai, u Wailadmiki Shylla da man u kam u symbood kongsan chirup i sakhilang u Ailad Bhoi, MDC ka Mukhla Wahiajer wei da pynchongchit da ki chaad sur yongrim da ki khon ka Seiñ Raij Mukhla deiwa tem sur, tem ksing, ki Clarinet, ki Harmonium da kiwa chimbynta ha kani ka Chaad Sukra ka Seiñ Raij Mukhla heiwa dapoi hadooh 380 ngut kiwa chimbynta na ki 38 tylli ki dhab chaad kiwa na ki 4 tylli ki dorbar chnong hapoh ka Mukhla Pyllun kiwa em hapoh i pait i pynlai ka Seiñ Raij Mukhla.
Ha chwa u sdang yei chaad, da pynlai ya ka yalang da u Airforce Suna, Vice President Seiñ Raij Mukhla heijooh i por man u leh u Waheh Chnong ka Mukhla Shohshrieh, wei da yoh leh yei ngooh Bali da u Pa Langdoh Niam ka Raij Mukhla, u Wanbha Lyngdoh wei da pynhær ya ka lama ka Seiñ Raij Mukhla da ka Santa Mary Shylla.
Da yoh leh yei klam pdiang burom na u Pynshai Shylla, Waheh Chnong ka Mukhla Umlangshor, da yoh leh i klam wa tbian na u Tiplem Sumer, General Secretary ka Seiñ Raij Mukhla, na u Standbyme Sari, General Secretary ka Dorbar Chnong Mukhla Nongrim, na u Wom Chyrmang, President Seiñ Kyntu Seiñ Raij 12 Daloi, na u Ailad Bhoi, na u Wailadmiki Shylla wa na ka kongsan katwa ya ki kyntien e khublei da yoh na u Buhlut Suna, Waheh Chnong Mukhla Nongrim.
Da wan pynchongchit ya kani ka Chaad Sukra ka Seiñ Raij Mukhla da ki President, Secretary ki Seiñ Raij waphær waphær na ka Sengkhihlang, Seiñ Kyntu Seiñ Raij 12 Daloi, ka Seiñ Raij Latymphu, Seiñ Raij Kongwasan Chyrmang, na ki sahep sorkor napoh ka District, na u C. Syrti, Superintendent of Police ka West Jaiñtia Hills District wa na u Pator ka Raij Mukha na Nangbah u Dibormi Thubru.
Ya kani ka chaad sukra ki khon ka Seiñ Raij Mukhla da jooh chaad ki man-u-snem hachwa u hiar rep hiar riang ki cha hali cha lyngkha ya u kba u khoo, man ko leh kam chibynta ka chaad e ngooh ya ka Bei Rymaw kawa psa wa pyntun ya ki khon u Ynñiaw Wasa, heijooh i por leh kamwa pynneh pynsah ya ka niam ka rukom, ka dustur ka riti yong ka jaitbru Pnar.
Ha kani ka sngi Chaad Sukra ka Seiñ Raij Mukhla da yoh leh u pynkup burom ya u khon ka Seiñ Raij Mukhla, u Wailadmiki Shylla, MLA ka 2-Jowai Constituency kattu la 2 sien, heijooh i por leh ka Seiñ Raij Mukhla da pynkup burom ko ya u Phrang Pale, Executive Engineer NEC uwa na ka Seiñ Raij Ialong, u uwi na ki sahep sorkar uwa ym jooh mylliñ ya ka Seiñ Raij Mukhla uwa smat wow yarap ya ka Seiñ Raij Mukhla nadooh ki kaam kiwa yatoh wa ka yung krehkaam yong oo wa ya kiwi tawon ki kaam kiwa ka Seiñ Raij Mukhla da jooh pynsñiaw ko ha oo.
Ini toh katkam i pynlait khubor u Standbyme Sari, Auditor ka Seiñ Raij Mukhla.
