Jowai: Ynne ka sngi ka Seiñ Raij Wahiajer da pynman ko ya ka Chaad Sukra yong ka heiwa da wan sakhi ya ka da ki spah ngut ki khong ka chnong ya kawa da pynman ha Iawpynsiñ, West Jaiñtia Hills.
Ha kani ka sngi u Dolloi ka Elaka Jowai u Puramon Kynjing da man u kam u kongsan, katwa u Waheh Chnong ka Wahiajer u K. Shylla da man u kam u symbood kongsan. .
Ya ka yalang hachwa wow sdang da pyllai da u C. Pale uwa man kam u Chairman ka Seiñraij Wahiajer.
U Dolloi hei klam yong oo kam u kongsan da ong u wa ka Chaad Sukra ymtoh du neibynta ka rep ka riang da wan ko wow pynkynmoo ya i ki bru kiwa hiar pateiñ wa yoh pateiñ na ka dustur riti wa i em i ka yong i dahi ki rwai ki siaw ki tiar tem tiar put kamtæ ka Chaad Sukra toh wow pynim biang ya kini waroh da ong u Dolloi.
Neibah lada i kam ki tre ym bien i u pynemkaam yei yong i hi, da eh wa kiwi wow chim kti kiwi neibhah hapoh ka ri India em ko da ki hajar tylli ki dustur riti ki jait bru waphær waphær.
Ha kani ka sngi da em ki chaad wa da pynkhreh da ki khon ka Raij kam ki Chaad Kylleiñ Kti, Chaad Pliang, Chaad Kpær Syntu, Chaad Laho wa kiwi kiwi.
Discussion about this post