Ka Lehniam Chaad Tyllu toh kawi na ki lehniam yong ki khon ka chnong Mynso wa da pynjooh sikai deilang ka niam ka rukom wa i chaad i kmen hachwa wow sdang i bet i thung hapoh ka chnong Mynso.
Ha uni u snem ya kani ka leh niam da pyndep ha ka 7 tarik uni u bnai heiwa ki khon ka Seinraij Mynso kiwa dang skem i ngait ha ka niam wa yah watyoor ki manchwa longchwa dawan ki wow ya chimbynta hapyrdi i riam i bait wa yoophooh yoophieñ wei yoo chongkun chongkhia wei ha kani ka sngi ya kani ka leh niam da wan sakhi pynchongchit leh da u Pa Dolloi ka Elaka Jowai, u Wh. Puramon Kynjin, u Vice- President ka Seiñraij Shangpung, u Wh. Nitajen Manner, u President Sein Kyntu Niamtre 12 Dolloi, u Wh. Moonlight Ktung, u Vice-Chairman Niamtre Committee Seiñraij Jowai, u Wh. Chanlok Dkhar wa kiwi kiwa chah khut sñiawbha.
Chwa wow sdang ki khon khynroo khyllood ka Seiñraij Mynso u mih chaad, da em ka yalang yahkhmat wa tbian hei pynlai u Pynhunmi Chen, General Secretary Seinraij Mynso heiwa u Kynmoo Situng da siang u ki kyntien ngoohblai ngoohsyiem, u Pa Dolloi ka Elaka Mynso da e u ki kyntien yahkhmat neitæ u Wh. Washington Shylla, Adviser Seinraij Mynso da khana pynsñiaw u hakhap u wa boon walang chaphang ka yurim yong ka lehniam Chaad Tyllu katwa kiwi ki waheh kiwa da klam e mynsien ya ki khon ka Raij Mynsoo ha kani ka sngi toh u Moonlight Ktung, President SKN-12 Dolloi, u Chanlok Dkhar, Vice-Chairman NTC-Seinraij, u Nitajen Manner, Vice-President Seinraij Shangpung wei hawa kut won, kawi na ki manbei yong ka Seinraij Mynso ka Synshar Passah da e ko ki kyntien sñiawngooh.
Katkam i khana u Wh. Washington Shylla da ong wa ka yurim yong kani ka lehniam toh wow e ngooh e dem yow Blai Trekirot kamjooh ya ka Blai Tyllu hachwa wow sdang i rep i riang i thung i tep khnang yow yoh ki khon ka chnong ka raij yei kyrkhu khyrdoh wei yow miat u bha i rep i riang, i thung i tep yow dap thiar dap tyllu u kdang u kot, u kyllep u sdep ka yung ka sem ka chnong ka Raij.
