Ka lympung wa 24 ka Seiñ Kyntu Seiñ Raij 12-Daloi da poi ko cha wakut ha ka 31-01-2021 ha ka chnong Rangad deiwa pynman lang waka Seiñ Raij Rangad. Ha kani ka sngi ki khon ka Bri U Ynñiawtrep Ynñiaw Skum da tooid paidbah ki cha kani ka lympung wow ya chimbynta.
Ha kani ka sngi pynkut yaka lympung da sdang ya ka nadooh i por 10:30 i step wei da pynlai yaka da u Wom Chyrmang President ka SKSR 12-Daloi wei da yoh yei klam pdiang burom na u Meliyo Lyngdoh, Executive Member ka SKSR 12-Daloi katwa yaka General Report da e da u General Secretary u Chanky Nongrum.
Da yoh leh yei klam na u Dr. Damewan Suchiang na ka Seiñ Raij Shangpung hajrong ka phang “Ka kamram ki khynroo khyllood ha ka imlang ka sahlang” wei kamjooh leh na ka Santina Mawlong kawa man kam ka Asst. General Secretary ka Sengkhihlang hajrong ka phang “U Hynniew Trep Hynniew Skum ha ka Sengkhihlang”.
Da yoh leh yaki chaad tynre na ki chnat Seiñ Raij waphær waphær.
Ha kani ka sngi pynkut yong ka lympung kawa da wan wow sakhi lang da u MLA ka thaaiñ u Kyrmen Shylla uwa man leh u Montri sorkar wa pait ya ka chnat Social Welfare deiwa emlang leh u Lakhmen Rymbui, MLA War Constituency uwa man leh u Montri sorkar uwa pait ya ki kaam pohyung, ka chnat puræ puthi wa kiwi kiwi.
Kamtæ neiliang yong ka Seiñ Kyntu Seiñ Raij 12-Daloi da e khublei ko yaki bor District lynga ka yung krehkaam u Deputy Commissioner kawa da e bor wow pynman yaka lympung heiwa ka lympung da man ko kawa jop deiwa bood yaki kyndon sorkar nadooh wow thaw chit wei wow chim yei pyrtuid yong uwi pa uwi wa wan cha ka lympung.
Ka Seiñ Kyntu Seiñ Raij da e khublei ko leh ya u Kyrmen Shylla uwa da e sñiawbha yaki Pandal kamjooh ki tanghæng, ka chnat PWD, PHE, MeECL, ki pulit wa ki wakreh haka chnat i chait i khiah deilang waka SKSR 12-Daloi wa ka bor chnong wow pynman yaka lympung kawa jop, wa u Blai u theh chooh chooh u yei kyrkhu kyrdoh ya phi hei im yong phi man-ka-sngi. Da e khublei leh ya u S.K. Sunn, MLA Mawphlang Constituency uwa da e sñiawbha cha ka seiñ neibynta wow pynlai bait pynlai ryntih ya ki kaam yong ka seiñ.
Ini man ko katkam wa pynlait khubor da u S. Sari Publicity Secretary ka Seiñ Kyntu Seiñ Raij 12-Daloi.