Ka lympung wa 26 ka Seiñ Kyntu Seiñ Raij 12 Daloi dapoi ko cha wakut ha ka 29 tarik uni u bnai ha ka Seiñ Raij Chnong Wapung Chnong Raij Tuber deiwa wan tooid ki khon ka Bri u Ynniawtrep Ynñiawskum cha kani ka lympung wow ya chimbynta.
Ya ka sngi pynkut da sdang nadooh i por 10:30 i step wei da yahkhmat da u Wh. Wom Chyrmang, President wei da pynlai da u Wh. Meliyo Lyngdoh, Executive Members ka SKSR 12-Daloi wei da yoh yei klam pdiang burom na u Wh. Standbyme Sari, Adviser ka SKSR 12-Daloi wei ya ka General Report da e da u General Secretary, u Wh. Leki Sayoo.
Da yoh leh yei klam phang da u Pet Dhar na ka Seiñ Raij Nangbah hajrong ka phang “Ka niam ka tehsong ia ka jaitbynriew” wei kamjooh leh na ka Sailang Lyngdoh kaw na ka Seiñ Raij Dienchynrum hajrong ka phang “U pynneh pynkmai ya ka niam ka rukom” wei da yoh leh yei klam na Dr. Solony Bareh na Sengkhihlang hajrong ka phang “Pynjanai ia ka nongrim ha ka riti ka dustur” wei da yoh leh ya ka chaad tynre na ki chnat Seiñ Raij waphær waphær.
Da wan leh wow sakhi lang ya kani ka sngi pynkut ya ka lympung da u MLA ka thaaiñ, u Kyrmen Shylla uwa man leh u Montri yong ka sorkar, u Nehlang Lyngdoh, MLA warim ka Khliehriat Constituency wa u Lasky Rymbai, Deputy CEM JHADC wa kiwi kiwi de.
Kamtæ neiliang yong ka Seiñ Kyntu Seiñ Raij 12-Daloi da e khublei ko ya ka bor District wa da e bor ki wow pynman ya kani ka lympung, ya u Kyrmen Shylla uwa da e poisa yow pynchna ya ka pandal wa kamjooh ya ki tanghæng namo ki Sound System wei kamjooh leh ya u Nehlang Lyngdoh uwa da e poisa neibynta ki chuki kamjooh leh ya u Pa Dolloi ka Elaka Nangbah, ki chnat Seiñ Raij waphær waphær, ka chnat pulit, ka chnat i chait i khiah wa ya ka bor chnong wa da ye u pynman ya kani ka lympung kawa jop.
