Ka Shad Pomblang ka Hima Khyrim ya kawa tip kam ka Shad Nongkrem yong u snem 2022 da poi ko cha wakut hapyrdi i phooh i phieñ ynne ka sngi heiwa da sakhi ya kani ka lehniam tynre da ki hajar ngut ki paidbah ha madan chaad ha Smit.
Najrong ki khon ki hajar ka Hima Khyrim wa kiwi ki paaid ha kani ka sngi da sakhi lang nadooh u Montri Rangbah, u Conrad Kongal Sangma, u Lamphang ka Yung Dorbar Chna Aiñ, u Metbah Lyngdoh, ki Montri sorkar wa kiwi kiwi.
Kani ka chaad toh chibynta na ki lehniam wa san sngi lynter ha ‘Ïing Sad’, wa man i yung wa sah ka Syiem Sad ka Hima Khyrim. U Syiem ka Hima Khyrim, u Dr. Balajied Sing Syiem, ryngat ki wakhroo, ki Langdoh, ki Montri ka Hima pynman ki ya ka lehniam ‘Pomblang’ ryngkat i riam tynre, heiwa da pam ya u blang wow e ngooh ya u ‘Lei Shyllong’; na uwa ki syiem wa synchaar katni yong ka Hima hiar pateiñ ki.
U Montri Rangbah, u Conrad Sangma hawa klam ha kani ka sngi da ong u wa man iwa emkaam wow pynneh pynsah wei wow pynku ya ka Shad Nongkrem kamjooh ya kiwi ki lehniam leh rukom tynre yong ka jylla, neibhah kam kini ki lehniam pyntipmit ko ya i man kyrpang kiwa chong chnong.
U Conrad ha kani ka sngi da pynbna u leh ya ka poisa yarap wa T. 2 klur neibynta wow pynbiang yeiwa emkaam yong ini i thaw wa pynman Shad Nongkrem, wei kani man ko ka bynta wa nyngkong. Da pyntikna u leh wa daw e yarap chooh neibynta kini ki lehniam kiwa phooh wa phieñ khnang wow pynman ha i rukom wa rap khroo ym du neibynta kiwa chong chnong tangwa neibynta ki bru wa wan sakhi na baar leh kamjooh.
