15 49.0138 8.38624 1 0 4000 1 https://wyrta.com 300 0

Phooh phieñ ka tamasa Discover East Jaiñtia wa arsngi wow pynku ya ka kaam uiñke suwari

0 Comments
Advertisement ad1

Jowai: Ka tamasa Discover East Jaiñtia wa ar sngi wa pynman da ka Rymbai Elaka Tourism & Environment Society waka Sanglei Organisation chirup i krehlang wa ki bor District East Jaiñtia Hills Khliehriat da poi ko chawa kut haka 24 tarik uni u bnai ha Leshka Suchen, East Jaiñtia Hills.

Ha kani ka sngi pynkut chwa u sdang ya ki lehkmen waphær waphær da em chwa ka yalang wa pynlai da u Dolloi ka Elaka Rymbai u E.Swer uwa man leh u President ka Rymbai Elaka Tourism & Environment Society.

Advertisement ad1

U M.S. Lhuid, Deputy Commissioner East Jaiñtia hawa e i ktien yahkhmat da ong u wa i pynman ya kam kani ka tamasa toh yow pynsñiawthooh ya ki paidbah hei yatoh ka kam uiñke suwari khamtam ya ki tre chnong wa em ki thaw wa yoosuk, neibhah wow pynku ya ka kaam uiñke suwari nyngkong toh u sñiawthooh chwa ki tre chnong wa hawa wan ki bru cha ki thaw yong i kammon u pdiang ya ki wa kiwi wa emkaam u leh.

Da ong u wa i wan ki bru na baar cha ki thaw yong i toh yow pynlut poisa ki wei chwa u wan ki leh da booh ki ka mang poisa wow pynlut, tæ pynyoo katai ka poisa wa pynlut ki lai ko cha waroh kiwa chong chnong.

Da ong u leh wa i man i kiwa embhah, neibhah kiwi tawon ki thaw wym em ki ka rymaw wa yoosuk kam i, wei ka District East Jaiñtia em ko chiboon ki thaw wa yoosuk wei kam ha kani ka thaw wa pynkut ya ka tamasa ye u chynna ya ka Leskha Dam kamjooh i soodong sookun wa yoosuk, wei chwa u poi cheini i thaw cha palat ka chnong Rymbai nadooh na yingkieñ Umchong da yoo ya ki sarok ki loom ki wah wa yoosuk.

U kongsan yong kani ka sngi u Coming One Ymbon montri ka tnat PWD (Building) hei klam yong oo da ong u, ka kaam Tourism man ko kam ka karkhana e khih e khreh ha kini ki sngi khamtam cha kini ki thaiñ hadien wada khang tih mooyong ka NGT.

Tangwa ong u iwi wa pyndiaw won ya oo toh i rukom pyrkhat ki bru yong i khamtam cha nongkyndong, heiwa boonsien jooh pyrkhat yei wasih bait bar yeiwa bha. Da e nongmuna u wa em ki chnong ha ri-loom Jaiñtia wa tang kat ka taw dih kaid namo ka Bar leh wym e NOC ki wow booh haki thaw sah kam ki Resort katwa kiwa dai charood chakiar won boon ki. Ong u wa uwon uwon uwa uiñ suwari hawa wan ki wym em mut ki wow dih u baam hadooh wow pynmih i arwi awra haki chong ki thaw, tangwa wan ki yow pait ya ki thaw wa yoosuk yong i wei u pynthanda yei thij i pyrkhat i doh i pran yong ki kamtæ emkaam u pyrkhat yeiwa emkaam ki.

Da ong u wa toh u em ha i i pyrkhat wa thymme neibynta u pynku ya ka kaam uiñke suwari wei da kyrpaad u wa lada em kiwon kiwa kwah u booh ki kynja thaw sah kam ki Resort waki Hotel wow sñiawbha u e NOC ya ki katkam ki kyndon wa toh u leh ki, wei ym hoi won u elaad ya ki khon ka chnong u ya lai dih lai baam ki.

“Hawa kwah i u wan ki bru wa na baar toh u pynyoo i wa man i kiwa yakrehlang, ymtoh hawa wan ki bru u kheiñ bru wa sih noh ya ki tangwa toh u kylli u takit u yaklam waki, neibhah lada man i ki bru wa khim i pyrkhat da lei lei ym ye u pynku ya ka kaam uiñke suwari,” da ong u Ymbon.

Kamtæ da yooluti u wa kani ka Society daw ku ko chaphrang wei daw poi i por u ye ko u e khih e kreh ya kiwa boon ki khon khynroo khyllood.

Ha kani ka sngi hadien wa kut ka yalang da em won i chaad tynre wada yachim bynta da ki chnong waphær waphær wei hei miet won da em kiwa tem na ki dhab tem waphær waphær.

Advertisement ad1

0 Comments

Leave a Reply