Ka Behdieñkhlam 2025 ka Raij Jowai ynne ka Mulong 12 tarik da poi ko cha ka sngi wa ar heiwa nyngkong dang step da pyndep ya ka Kñia Aitnar hapoh i pait i yoo u Dolloi, Pator, Langdoh, Sangot, Wasan wa kiwi.
Ki Kmairaij ynne da lai thooh ki ya ki Dieñkhlam na khloo wow wanrah chapoh ka Raij katwa ki Khonraij won da lithooh ki ya ka Khnong Blai.
Hadien won da wanrah ya ki Dieñkhlam cha Iawmusiang da jar jiar ki chnong wa kynthup ya ka Panaliar, Loomiongkjam, Loomkyrwiang, Iongpiah, Tpe-Pale wa Dulong.
Neitæ won ka Khonraij da lai thooh ki ya ka Khnong Blai ya kawa da pynchong chipor ha Poh Sawiar (hajan ka yung krehkaam u DC, Jowai) wei da rah ya ka cha Loomsooyung (hajan Marian Hill HSS) manda poi lut ki Dieñkhlam ha Iawmusiang.
Ynne ka sngi ki khynnah chynrang wa kynthai wa ki waheh da chaad ka’it ki hei mynsien wa kmen hei kieh ki bom, ki bikur, ki chæng chæng wa ka bhuri.
U Dolloi ka Elaka Jowai da ong u wa ynne da pynpoi lut ya ki Dieñkhlam da ki Kmairaij wei hadien won ki Khonraij da pynchong ki ya ka Khnong Blai ha Loomsooyung.
Ya kani ka sngi da wan sakhi da ki hajar ngut ki kynthai wa khynnah kiwa da riam ha ki sula wa miat wa phooh wa phieñ chirup wa i ksiar i rupa iwa pynman ya ka sngi kawa chongkhia.
Discussion about this post