Ynne ka sngi da pynman ya ka Lehniam Pastieh wei Chaad Niamtre yong ka Raij Raliang, Elaka Raliang ha Madan Iaw Raliang deiwa wan sakhi u Deputy CM, u Sniawbhalang Dhar kam u kongsan deiwa emlang leh u MLA ka Mowkiaw, u Nujorki Sungoh kam u symbood kongsan.
Kani ka Lehniam Pastieh wei Chaad Niamtre da man ko kawa phooh wa phieñ wei yoo chongkun deiwa chimbynta u Dolloi, u Pator, u Langdoh wa ki waheh kur waphær waphær ka Raij.
Ya ka lehniam da sdang nadooh 7 waje i step da ki Waheh Niam na ki kur waphær waphær deiwa rah ki jar jiar i dan i khat hapoh Yung Raij Yung Langdoh nadooh u Blai Waheh Blai Wakhroo, u Syiem Sngi wei da pyndep leh ya ka niam u Blai Shyllong wa kiwi de.
Ki kur waphær waphær da pyndep ki jar jiar ki lehniam wa da pynkham ha ki nadooh ka kñia ka khriam neibynta ki Blai ki Syiem kiwa em hapoh ka Raij Raliang.
Neiliang u Siawbhalang Dhar hawa e yei klam da ong wa kat dang im ka riti ka dustur kattæ dang im ka jaitbru, wei da kyntu u leh wow pynneh ya ka riti ka dustur yoh im ka jaitbru.
Da kular u leh wow yarap poisa Rs. 15 lak wow pynmiat ya ka yaaw.
Hachwa kani ka sngi, ha ka 6 tarik uni hi u bnai da em i Kñia Sih ka Raij Raliang, ha ka 8 tarik da pynman yei pynkhooid yaaw Raliang da ki le chnong kitæ ka Raliang, Laskein wa ka Nongkynrih.
Da pyndep leh ya ka Kñia Ronchindi ha ka 12 tarik wei da pyndep leh ya ka Kñia Pyrtuh heipor janmiet.
Discussion about this post