Phra snem phah kset ka yung bichaar ya uwa slaitbor ya kawi ka bru

Ka yung bichaar u Sessions Judge, Jowai ha ka 9 tarik uni u bnai da rai pynrem ko ya uwi u koidi wa tip kam u Se Phawa hapoh ka kyndon 376(1) ka IPC heiyatoh wa i slaitbor u ya kawi ka bru heiwa da phah kset oo 8 snem deiwa pynchitom bha deilang ka kuna kawa Rs. 5000 wei lada ym su u yeini daw hap u wow chong kset sa chi bnai.

Tangwa neidaw wa da chong patok u la chi snem soo bnai, kamtæ da phah kset noh oo ynru snem phra bnai deilang waka jooh hi ka kuna.

U Se Phawa da ujor FIR pyrchah ya oo ha Jowai Police Station deiwa chah pynbaad u wa ha ka janmiet ka 14-12-2008 heipor kamwa 5:00 waje da slaitbor u ya kawi ka bru heipor wa dang liwan ko cha yung.

Kani ka bru da ong ko leh najrong wa slaitbor u ka, da maham pynyap u ka lada pyntip ko cha kiwon kiwon.

Related posts

Yoh kem drugs kiwa chong chnong ka Namdong

November 23, 2024

Yoh kem ki pulit ya uwa lai maham bru da kawi ka Pistol

November 21, 2024

Kamtæ da kem ya oo ha ka 15-12-2008 wei da yoh u wow mih napoh patok ha ka 15-03-2010 deiwa yoh jamin hadien wa chong patok u 455 sngi wei da lai kem biang oo ha ka 12-08-2024, wei da kset ya oo 30 sngi iwa mut waroh da em u hapoh patok la 485 sngi iwa dapoi chi snem soo bnai.

Katkam ka kyndon ka 428 ka CrPC daw kset ya oo sa ynru snem phra bnai.

Ka yung bichaar da tyrwa ko wow e yarap cha kawa chah slaitbor Rs. 2 lak.