Ka All Meghalaya Ad Hoc Lower Primary School Teachers Association (AMAHLPSTA) da pynsñiaw ko yei sñiawkhia heiyatoh wym biang yukheiñ katwon tylli em ki Ad-Hoc Primary School hapoh ka jylla.
Katkam wa ong u R.S. Khardewsaw, President ka AMAHLPSTA wa katkam ka yukheiñ ka Directorate of School Education and Literacy (DSEL), wa em 558 tylli ki Ad-Hoc Lower Primary School hapoh ka jylla, katwa kawi won wa pynbna ka sorkar wa em 1225 tylli kam kini ki skur.
“Kwah i wow tip cheiwon em kitæ kiwi ki 667 tylli ki skur,” u Khardewsaw.
Hawa kylli wa lada kini ki 667 tylli toh kiwa du hei pyrtuid donhi, u President ka Association da ong u wa ini toh i yong ka chnat puræ puthi wow jubab.
Da maham u leh wow pynman yaka yakhih hadooh wow lai cha ka yung bichaar lada ka sorkar ym ye ko wow e yutip wa bniah chaphang kini ki 667 tylli ki skur.
Ka AMAHLPSTA da pynbaad ko leh wa u Montri ka chnat puræ puthi u Lahkmen Rymbui da kyntait u wow yachem yaki.
“Da pyrchang i wow yachem wa oo nadooh u snem 2018 wei da dep leh wow pynkynmoo boonsien tangwa ym em poi cheiwon cheiwon,” da ong u.
U Khardewsaw da ong u wa iwa ye ki wow phah cha u Montri toh du yaka dorkhat lyngba u Personal Secretary.
“Ha uni u bnai da yaklam i wa oo da ka Phone tangwa da pyntip u wa ym em u ha Shillong,” da ong Khardewsaw.
Ki dkhot ka Association da ong ki wa da kwah ki wow yachem wa u Rymbui yow kyrpaad pynku yaka tulop neibhah kawa yoh ki katni da duna ware ko lada pyrkhat yei ku dor k i mar.
“I kwah i yaka sorkar wow pynku kyrdan ko yaki Ad-Hoc Lower Primary Schools cha ka Deficit System. Lada ym ye toh u pynku noh yaka tulop naka T. 12,000 cha ka T. 30,000.”
U Khardewsaw da ong u leh wa em du arngut donhi kiwa sikai ha ki Ad-Hoc Lower Primary School kiwa hap wow sikai yaki khynnah nadooh Class Nursery hadooh Class V.
Da kyntu u leh yaka sorkar wow thung uwi wa sikai ha kawi ka Class lane dei wym duna ya 5 ngut kiwa sikai ha kawi pa kawi ka skur.
U Khardewsaw da ong u leh wa toh u em i jooh i su ya i jooh i kreh.
