Ka Environment Coordination Committee (ECC) hei lai booddien ko yei em ki karkhana Coke kiwa dang krehkaam pyrchah ya ka aiñ kiwa em ha East Jaiñtia Hills, wei deiwa em wa pyntip yeini, ha ka 14-12-24, u President ka ECC, u Never Lamurong deilang wa ki dkhot da lai pait ki ya ka Coke Plant wa tip kam ka M/s Barbarik Coke wa em ha Nongjri, Elaka Sutnga wa kiwi de wei da chem wa kini ki Coke Plant toh kiwa dang pynchna wei dang pynkhreh yow pynkrehkaam noh ki.
Da pyntip wa da em 31 tylli ki karkhana Coke kiwa da kheiñ toh kiwa da man pyrchah ya ki kyndon wei da chah pyndam leh ka Application yow chna ki da ka Meghalaya State Pollution Board (MSPCB) ha ka 06-01-22 wei da chah daiñ kuna ki leh wa hap ki wow su hapoh 15 sngi wei ini i kaam toh iwa dapoi cha ka National Green Tribunal (NGT), Kolkata wei dadep leh wow ujor cha ka District Court pyrchah yeini wei ki mukotduma toh kiwa dang em hei chah bichaar.
Tangwa ka ECC da chem ko lyngba ka RTI wa hanla da jia ini waroh, ka MSPCB da e ko 16 tylli ki CTE yow e bor u chna karkhana kiwa man kamni.
- M/s North East Coke Industries
- M/s Magic Coke Second Chimney
- M/s MM Minerals
- M/s Unique Coke Industry Second Chimney
- M/s Presidium Breez
- M/s Ioanis Industries Pvt Second Chimney
- M/s Mega Coke Second Chimney
- M/s Umthe Carbon
- M/s Jaintia Coke Industries Second Chimney
- M/s SD Coke industries
- M/s Vaishnu Private Ltd
- M/s Malang Coke Industries
- M/s Barbarik Coke Industries
- M/s Royalborn Associate Coke
- M/s Westland Coke
- M/s SS Coke
Kamtæ ka ECC da ong ko wa da phylla wa kammon wa kini kiwa boon ki karkhana Coke kiwa da kheiñ kam kiwa man pyrchah aiñ, kattæ won ka MSPCB da leh ko heitæ i rukom yow pynman ya ki kam kiwa da leh da bood ya ki kyndon aiñ.
Da maham leh wow thooh laad wow yaleh pyrchah yeini wei da ong leh ya ka sorkar wow dam noh u e License ya kini lym kamtæ u lai luti katkam ka aiñ pyrchah ya ka MSPCB kam kawa kitkhlieh yeini waroh kamjooh leh kiwi de ki sahep sorkar.
Kamjooh daw lai booddien leh ya ki kot ki sla wa da e da ka MSPCB yow chem kammon da leh yeini waroh wot hadien wa dadep wow pyndam yei e bor u chna ya kini ki karkhana wei daw rah yeini cha ka NGT pyrchah ya ka MSPCB wa tyngkheiñ ko ya ka aiñ.
Chooh chooh da ong wa lada kamni, ka East Jaiñtia daw man ko kam ka Byrnihat wa thymme.
Discussion about this post