Yow pynsñiawthooh ya ki khynnah skur hajrong kammon u man kiwa pynkhreh ya idæ la jia wan iwon iwon i bor pynsih pynpra ka ramaw namo ka Natural Disaster, kamtæ ha ka 25 tarik uni u bnai, neiliang ka chnat Home Guard & Civil Defence, West Jaiñtia Hills District deilang wa ka chnat i chait i khiah da lai e sikai ki ya ki khynnah skur wa kiwa sikai ka skur Government Girls’ Higher Secondary School Jowai deiwa pyndur wa khih khmi.
Kam i dak wa khih khmi, da pynkieh da ka Siren heiwa waroh ki khynnah skur da ya mih ki cha lait pchem ka skur wei hadien wa neiliang kiwa sikai chem ki wa em ki khynnah wa wiar kamtæ smat smat da phah ya ki khynnah wa dadep chah sikai yow li thooh ya kiwa mynsoo na ki kamra skur wei wow lai rah ki chei thaw wa da pynkhreh ha lait yow yoh ki yei bynta sumaar First Aid.
Chwa ini ha ka yalang tbian wa pynlai da ka Principal ka skur, ka Dr. Wa-i-sa Sumer da em leh i sikai wa da pynyoo da ka chnat Civil Defence hajrong kammon u e yarap ya ki bru wa mynsoo ha ki rukom waphær waphær, katwa neiliang u Dr. Arwin Khonglah, District Nodal Officer on Disaster Management, West Jaiñtia Hills District da e u i batai hajrong iyi mut ‘Disaster’ deiwa ong wym mut du yei chlai um, i diñ, i oor khyndaw, tangwa kynthup ko ya kiwa boon ki jait jia yong iwon iwon i jia wa wanrah yei mynsoo, i yap bru, i jæd i pra ki yung ki sem, ki jait wa chna wa tei ha iwon iwon i por toh ka Disaster wei wot ki jait baam wa baam leh kiwa man bih næ wanrah yei kjut chitom leh toh ka Disaster hi.
Neiliang ka chnat Civil Defence da mihkhmat u P. Kharbuli, Sub-Inspector wa kiwi de kiwa kreh.
Discussion about this post