Jowai : Ka chnong Lumpyngngad wa haap hapoh ka Amlarem Civil Sub-Division West Jaiñtia Hills District da kynjoh ko cha ka 50 snem kawa da seiñ nadooh u snem 1967 da ki chi kurim, u Belson Rymbai wa ka Merina Shylla, u Stone Swer wa ka Mill Rymbai kiwa na ka chnong Pasadwar.
Kamtæ kat dang mih ki sngi da boon kiwa wan chong chnong kiwa da paan bor naka Elaka Satpator wow jied noh ya u waheh chnong nadooh katai ka por. Ka chnong da roi ko wei katni em hadooh 115 tylli ki yung wei 564 ngut ki wa chong chnong.
Hei yatoh wei dap 50 snem, ka chnong da pynman ko ya ki program waphær waphær wei ya ini da pynkut ynne ka sngi da u MLA ka thaiñ u Stephanson Mukhim hei emlang u MDC ka thaiñ u Lamdibok Sumer,u H.Lamin MDC War Central, u L. Lakuna, u C. Talang wa kiwi kiwi.
U Stephanson da ong u wa kani ka sngi toh ka wow neh sah yanom lyngba i kreh chitom ki waheh wasian ka chnong. Da kyntu u leh ya ki paidbah wow man kiwa yatylli wei wow wanrah ya i roi i paar kamjooh wow pynku yei stat i tip.
Hei yatoh won wa i duna haka U.P. School wa dang dep seiñ ha u snem 2015, da kular u wow e yarap ya kani ka skur da kiwa sikai ha ka.
Ha kani ka sngi da pyllait leh ya ka Souvenir ka chnong da u H.Lamin MDC ka War Central.
Da pynchong chit ya kani ka sngi da ki chaad ki rwai na ki khynnah khynroo khyllood ka chnong.
Discussion about this post