Jowai: Ka 10th Annual School Sports Meet ka Pasadwar Cluster da pynhaap pyrda ya ka haka 7 tarik uni u bnai.
Ya kani ka Sports Meet da sdang haka 6 tarik uni u bnai ha chnong Kharkhana, WJH kawa em 9 tylli ki skur kiwa chimbynta heiwa 6 tylli toh ki LPS wa 3 tylli ki UPS.
Kini ki skur toh kiwa na ki 4 tylli ki chnong wa kynthup ya ka Kamsing, Kharkhana, Pasadwar wa Lumpyngngad wa haap hapoh ka Pasadwar Cluster.
Da wan wai pyrda ya kani ka Sports Meet da u waheh chnong ka Kharkhana u Thomas Nialang hei emlang ki waheh wa sian ka thaaiñ, ki waheh chnong, ki Secretary chnong, ki Secretary ki School Managing Committee, kiwa sikai, ki khynnah skur wa kiwi kiwi de.
Ki wa jop haka March Pass toh ka kyrdan UPS toh ka Pasadena UPS katwa haka LPS da jop ka Pasadwar Govt. LPS.
Haka lynpung yaleh Football ki chynrang ka UPS Lumpyngngad da man ko kawa jop katwa ha ki kynthai ka UPS Kharkhana da jop ko katwa haka kyrdan LPS ka Kharkhana Govt LPS da jop ko neiliang ki kynthai, yei naam Best Discipline da rah ka Kamsing LPS wei da saam leh ya ki khusnaam cha kiwa da leh bha yong samen.
Ha kani ka sngi da pyllait leh ya ka kot sahkynmoo namo ka Sovenier.
Ini toh katkam wa pyntip u Secretary Cluster u Deimonmi Bareh.
Discussion about this post