Kawa nyngkong dooh ka dongmusa ka Chess Olympiad Torch dapoi ko ha Shillong ynne i step hadien wa lai luti ko na kiwa boon ki bynta ka ri. Ya kani ka lai luti kani ka dongmusa namo ka Torch Relay da kaweh lama da u Prime Minister ka ri, u Narendra Modi ha IG Stadium, New Delhi ha ka 16 tarik u Naiynru.
Kam chibynta leh i dap 75 snem i yoh laitlooid ka ri, kani ka Chess Olympiad Torch leh da lai rah ya ka cha ki 75 tylli ki sor ka ri chwa wow pynkut ha Chennai, kawa daw pynman ya ka 44th FIDE Chess Olympiad nadooh ka 28 tarik uni u bnai hadooh ka 10 tarik u Naisaphra, 2022.
Ya kani ka dongmusa ha Shillong da wanrah da u Grandmaster Mitrabha Guha uwa da e kti ya ka cha u kongsan ha kani ka sngi, u Dr. LR Bishnoi, DGP ka Meghalaya ha SAI Indoor Stadium, NEHU, Shillong.
Neilian u DGP da ong u wa da man ko ka burom ya oo khamtam hawa pynman ya ka Chess Olympiad hapoh ka ri heiwa daw chimbynta da 187 tylli ki ri.
U Dr. Bishnoi da ong u leh wa ym em ki Grandmaster napoh ka North East, kamtæ da yooluti u wa kani daw e mynsien ko ya kiwi wow poi cha kani ka thong.
Kani ka dongmusa kattu daw lai ko cha Guwahati dep te cha Arunachal Pradesh chwa u poi ko cha Odisha wei pynkut ha Mahabalipura.
Ha kani ka yalang da em leh ki sahep ka chnat Sports, State Chess Association, Olympic Association, ki khynnah skur, kiwa yalehke ka SAI Centre NEHU Campus, ki NYKS Volunteers wa kiwa yalehke Chess.
