Jowai: Ka e sikai wa tip kam ka Youth Leadership and Community Development da poi ko cha wa kut ynnin ka 18 tarik kawa sdang nadooh ka 16 tarik uni u bnai ha chnong Phramer wa pynman da ka Diakonia Social and Development Society yong ka Jingiaseng Samla Shangpung Presbytery deiwa ya krehlang wa ka Nehru Yuva Kendra Sangathan Jowai.
I thmu yong kani e sikai toh wow sikai ya ki khynroo khyllood yow man ki kiwa kitkhlieh ha kiwon kiwon ki bynta wa em ki neibynta ka imlang ka sahlang deiwa tip bru tip blai, wei wow tip ki leh iyi mut wa im ki khnang yow ye ki u bichaar ya iwa bha wa iwa sih neibhah ka mynried chong ko ha ki, da sikai leh u man ki kiwa khlaan ha i pyrkhat pyrdaiñ yow ye ki u yaleh pyrchah ya i chah pynchoi kiwa boon khamtam ha kini ki sngi kiwa boon ki khynroo da cha kdoh ki ha ki jait dih pynmuaid wa boon jait hadooh wa da yah ko ya ki wow pynkut yei mynsien wa kordor yong ki.
Nadooh wa sdang hadooh wa kut yong kani ka e sikai wa le sngi ya ki khynroo khyllood da klam hajrong ki phang waphær waphær kam ka Personality Development, Report Writing, Impacts of Social Media, Goal Setting, Positive Mind, Pursuing Excellency, Effective Communication and Conversation Skills, Account Maintenance, Employment Opportunity for the Youth, Government scheme and Community Mapping,
Ya kini ki phang da e sikai da ki bru wa chemphang kam u D. Rapsang uwa man kam u District Youth Coordinator ka NYK Shillong, u Pro Pastor L.O. Garod, u Terence Sawian uwa man u Founder ka Winner’s Mind Foundation, Jowai, u H.B. Lyngdoh uwa man u District Statistical Officer, Tura, u KR Nongbri u Accountant yong ka NYKS, Nongpoh, u G. Laloo uwa man u Technical Assistant yong ka Employment Exchange, Jowai wa ka E. Nangbah ka Journalist DIPR Jowai.
Ha ka sngi wa pynkut ya kani ka e sikai da em leh kiwa yahkhmat ka Jingiaseng Samla Shangpung Presbytery, ha chwa wow saam ya ki Certificate cha kiwa chimbynta da yoh ya ki ktein sneiñ kyntu kynpham na u Rev. T S Lyngdoh ya kiwa chimbynta wow pynemkaam hok ya iyi wa da yoh sikai ki ha kini ki le sngi ha ki chnong ki thaw wa ki em ki khnang yow man ko ka kyrkhu ya ka imlang sahlang wa ka jaitbru hi waroh kawi.
Ya ki Certificate da saam cha waroh kiwa chimbynta da u General Secretary yong ka Jingiaseng Samla Shangpung Presbytery u Tbn. N Ryngkhlem, Pastor T.S. Lyngdoh, wa Tbn. C. Pala uwa man u Treasurer yong ka Presbytery.
Discussion about this post