Jowai : Ka Inter School Athletic Meet 2016 ynne ka 6 tarik da poi ko chawa kut ha Kiang Nangbah Stadium, Ladthadlaboh heiwa da wan chimbynta chongchit hadooh 24 tylli ki skur yong ka West Jaiñtia Hills District.
Da pynkut ya kani ka yakop ynne ka sngi daka ya phet 1500M ya ki chynrang wa em 16 snem cha neiñ.
U District Sports Office ka West Jaiñtia Hills u H. Shangpliang hei klam yong oo ong u wa na ri-loom Jaiñtia ha kini ki 20 snem da mih boon kiwa yalehke wa boon kiwa da mihkhmat ya ka jylla tangwa ha kini ki ar le snem da sdang hiar i wei kamjooh ha East Jaiñtia Hills da wan chimbynta hadooh 34 tylli ki skur ha kam kani ka jooh ka lympung.
Ong u wa em kamwa 50 tylli ki skur ha West Jaiñtia Hills, hei yachem u wa kiwa boon ki wa pyllai skur ong ki wa katni wa boonkaam ware ki khynnah hei puræ puthi ym yoh por ki u yachim bynta wei kamjooh leh wa duna poisa ka skur. Da ptein u deiwa ong waroh ym ye i u man IAS, Engineer, Doctor wa kiwi kiwi. Da e nongmuna u ya u Eugeneson Lyngdoh uwa chah pynbor u lai puræ Engineering u na yung tangwa i mynsien u thrang i u yaleh Football wei u ma Shnagpliang ong u wa jooh pynchlur u ya u Eugene yow bood u ya iwa ka-it i mynsien wei hadooh katni da man uwa kamai pyllat T. 1 Klur chisnem nei yaleh Football donhi.
U DC ka West Jaiñtia Hills ong u wa sniaw phylla u wa dang em ki skur wa ym em wan chimbynta ha kani ka Inter School Athletic Meet wei ong u wa lada ym wan chimbynta ki ha u snem wa daw wan daw chah pynchitom ki.
Hadein ini da saam ya ki khusnam wa joop ha ki yalehke wa boonjait. Wei da saam leh ya i naam Best Athlete Under-14 Boys cha u Dasaimonki Rymbai na ka skur KJP Synod HSS uwa da yoh kawi ka takma Ksiar wa kawi ka takma Rupa.
Yei naam Best Athlete Under-14 Girls da rah ka Rosamystica Phawa na Little Flower HSS, Ummulong kawa da yoh ar tylli ki takma Ksiar.
Ha ka kyrdan U-16 Boys ya i naam Best Athlete da yoh u Meshanki Suching yong ka JNV, Mukhla uwa yoh artylli ki takma Ksiar.
Neiliang ki kynthai ha kani ka jooh ka kyrdan U-16 Girls da yoh ka Manhaka Rabon yei naam Best Athlete kawa na ka skur North Liberty HSS, Jowai deiwa jop ko ya artylli ki takma Ksiar.
Ha ka kyrdan Above-16 Boys da rah u khynnah wa puræ ha Government Boys’ HSS, Jowai uwa tip kam u Eastgustar C. Lato uwa da jop ya artylli ki takma Ksiar.
Ka Emidabiangki Lamare yong ka KJP Synod HSS, Jowai da rah ko yei naam Best Athlete ha ka kyrdan Above-16 Girls.
Neiliang ki skur wa wan chimbynta ya ka Best Team ha ka kyrdan U-14 Boys da jop ka KJP Synod HSS, Jowai, Ka Littel Flower HSS won da jop ko ha kani ka jooh ka kyrdan neiliang ki kynthai.
Ka Best Team U-16 Boys da jop da ka Government Boys’ HSS, Jowai. Katwa neilaing ki khynthai ha kani ka jooh ka kyrdan da jop ka North Liberty HSS, Jowai.
Ha ka kyrdan Above-16 Girls da jop ka St. Mary Mazzarello HSS, Jowai katwa neilaing ki chynrang heini i jooh i kyrdan da jop da ka Government Boys’ HSS, Jowai.
Discussion about this post