Shillong: Hadien san sngi ki yalehke, da pynhaap pyrda yaka Meghalaya Games 2019-20 deiwa pynkut ya soo tylli ki jait yakob ynne ka sngi ha Shillong.
Da wan pynhaap pyrda ya kani ka lympung da u Chief Secretary ka Meghalaya u MS Rao IAS hei emlang ka Director of Sports & Youth Affairs ka Wanrilin Booth, ki dkhot ka Meghalaya State Olympic Association hadien wa pynkut yaka yakob Karate wa pynman ha Laban Indoor Stadium.
Ka East Khasi Hills da yoh nyngkong ko ya ki District deiwa yoh 69 tylli ki takma ksiar, 50 tylli ki takma rupa wa 53 tylli ki takma tama. Ka yakob Swimming, Tennis, Billiards & Snooker, Karate wa Shooting ym em kheiñ yaki kam ki takma wa jop neidaw wa pynman yaki kam ki Open Tournaments. Tangwa yoh hi ki ya ki takma.
Nalor ka Karate, ynne ka sngi da pynkut leh yaka yakob Judo ha Nongthymmai, Billiards & Snooker ha Shillong Club waka Badminton ha U Tirot Sing Syiem Indoor Stadium.
Haka yalang pynhaap pyrda da pynyoo rong leh yaka yalehke Karate, kawa da pyn ka-it ya ki paidbah.
U Rao hei klam yong oo da e khublei u yaka MSOA waka DSYA kiwa da ye u pynman ya kani ka lympung yalehke.
“Kani ka luti toh kawa bha dooh, wei da kyrchaan yaka leh da u montri rangbah u Conrad K Sangma,” da ong u Rao. “Yoosuk leh wow yoo yei chongchit kiwa chimbynta ha waroh ki yakob wei emkaam leh wow chem ya kiwa em yei sap yow ye ki u lai cha ki kyrdan yakob wa heh hapoh ka ri. Waroh ye i wow sñiawsarong ya kiwa yalehke yong i wei e khublei O leh ya ki wei sñiawskem O wa daw nang ku ki sam chakhmat.”
Da khana u leh wa da pynkrehkaam yaka Sports Policy ka jylla ka wow yarap u pynku yaka kaam yalehke yow pynkhreh yaka National 2022 ka wow pynman hapoh Meghalaya.
Discussion about this post