Ki 88 ngut ki dkhot ka India wa kynthup ya 54 ngut kiwa yalehke da poi ki ha Narita International Airport, Tokyo ynne ka sngi yow chimbynta ha ka Tokyo Olympics. Kiwa mihkhmat ka sor Kurbey da wan ki wow pdiang ya kiwa yalehke hapoh ka Airport. Ya kiwa yalehke da yoh ki yei kitbok kitrwiang ynnin ka sngi ha Indira Gandhi International Airport da u Anurag Thakur, Union Minister for Youth Affairs and Sports wa u Nisith Pramanik, Minister of State, Ministry of Youth Affairs and Sports chwa wow mih napoh India.
Kiwa yalehke ka India daw chimbynta ki ha ki 8 tylli ki jait yalehke wa kyntup ya ka Badminton, Archery, Hockey, Judo, Swimming, Weightlifting, Gymnastics wa Table Tennis wei da mih ki na New Delhi yow lai cha Tokyo ynnin i miet. Waroh kiwa yalehke ka India da em ki 127 ngut kiwa daw chimbynta ha ka Tokyo Olympics iwa man leh iwa boon dooh na India kiwa lai chimbynta.
U Anurag Thakur hawa e yei ktien pynchlur, da ong u wa ka Tokyo Olympics toh kawa emkaam bha ya ka ri wei da pyn-eh daw da ki 135 klur ki nong India ya kiwa yalehke ka ri. Da ong u leh wa kiwa lai chimbynta toh u chim kabu ki ya kani ka laad kawa da yoh ki yow man ko leh kam chibynta i lai luti yong ki chakhmat, wei wow leh katwa ye yow poi cha ka thong khlem da ap yei khia wa em hei tympha yong ki kamwa da e buit u PM Narendra Modi.
U Thakur da ong u leh wa kiwa yalehke toh u man ki kiwa khlan hei bor pyrkhat manda yakob neibhah daw yarap bha ko wow poi cha ka thong.
