Ka e sikai ya kiwa yaleh ka Meghalaya kawa 3 sngi kawa tip kam ka Elite Pathway Programme (EPP) wa da pynman ha SAI Centre, NEHU dapoi ko cha wakut ynne ka sngi deiwa pynchlur ya kiwa yalehke wow kreh chitom ki yow poi cha ka thong wa chakhmat.
Ynne da pynlut ya iwa boon i por neibynta ki 30 ngut ki Coach na ki yalehke wa boon jait deiwa chimbynta lang uwa jooh yaleh Olympics ka Australia, u Ian Campbell wa uwa yaleh World Cup ka Sweden kamjooh ya ka Manchester United, u Jesper Olsen deiwa emlang u Sports Science & Data Expert, u Dr. Aishwar Dhawan.
Neidaw wa boon na ki khynroo wa chimbynta toh kiwa kwah wow yalehbol, neiliang u Olsen da pynman u ya ka e sikai hei step yow pynhun ya kini waroh.
Ya ki Coach da sikai ya ki kammon wow e mynsien ya kiwa yalehke, kammon wow pynkhlan yei bor kiwa yalehke kamjooh kammon wow yada nei takha i mynsoo.
Waroh da em 200 ngut kiwa da chah jied ha kani ka e sikai heiwa 100 ngut toh ki chynrang wa 100 ngut won ki kynthai kiwa da wan na kylleiñ ka jylla wei daw booddien yei pynkhreh ki ha kini ki tayaw wow wan wei daw pynman biang ya kam kani ka e sikai ha uni hi u snem.
Puræ leh: Yaroh uwa yaleh Olympics ka Australia ya kiwa yalehke ka Meghalaya
