theme-sticky-logo-alt
theme-logo-alt

Psiah Final ka EGH wei jop ka SCA(A) haka Inter District U-19 Boys Cricket

Ka East Garo Hills da psiah Final ko haka Meghalaya Cricket Association’s Inter District U-19 Boys Cricket Tournament naka Zone 2 deiwa jop 7 Run ya ka Tura District Cricket Association ha Tura ynne ka sngi.

Katwa ha ka Zone 1 wa pynman ha Khliehtyrchi, ka Shillong CA (A) da jop ko ya ka SCA (B) da 30 Run yow jan psiah cha ka Final.

Hapoh ka Zone 2 kiwa yoh nyngkong da lai ki sak cha ka Final. Katwa ka Zone 1 kawa em ka Group A wa Group B daw pynman ya ka Zonal Final ha kani ka 30 tarik yow jied ya kiwa psiah cha ka Final kani ka lympung yaleh Cricket.

Ha Khliehtyrchi, ka Shillong Cricket Association (A) da jop ko yaka kylla khlem wei da dajied ko wow Bat nyngkong heiwa da lai ko wow kamai 171 Run na ki 28.4 Over deiwa dooh ko waroh ki Wicket.

U Mrinal Das da kamai u 86 Run (14×4, 2×6) na ki 48 bol, u Mrityunjay Bharali won da kamai u 47 Run (7×4,1×6) na ki 42 bol. U Basant Chettri yong ka Shillong Cricket Association (B) da yoh khur u 4 Wicket na ki 7 Over. Ka Shillong Cricket Association (B) hawa beh yaka thong da ye ko u kamai 141 Run na ki 27.1 Over deiwa haap lut ki Wicket. U Ayush Sharma toh uwa yoh boon dooh ki Run deiwa kamai u 23 Run (3×4) na ki 29 bol. U Mrinal da yoh u pynhaap 4 Wicket na ki 5.1 Over wei da yoh u leh yei naam Player of the Match.

Ka yalehke mynstep ka 28 tarik heipor 9:30 i step u man ko hapyrdi ka East Khasi Hills Cricket Association pyrchah ya ka Ri Bhoi Cricket Association ha Khliehtyrchi. Katwa ka South Garo Hills daw yachem ko waka North Garo Hills ha Tura yow pyndep ya ki yalehke wa dang sah.

Ka SCA (A) toh kawa da em hakhlileh ka Group A da 8 Point iwa mar kat jooh waka SCA (B) tangwa rap bha ka Net Run Rate ki. Ka Ri-Bhoi (4 Point) ye kow wo pyntam ya ka SCA (A) lada jop ki ya ka East Khasi Hills mynstep tangwa emkaam u jop ki deiwa tam rap boon.

Share this:
Previous

Dawa ka seiñ ki wakreh ka MeECL wow pynskem noh ya i kreh yong ki 

Next

U booh ya ki thaw yakhle cha ki thaw khappood waka Assam chajan Guwahati: Conrad