Jowai: Ka Thomas Jones Synod College, Jowai toh kawi na ki chlem sikai wa chim u seiñdur yei long i man ki khynnah puræ ha ki rukom waphær nalor i e ha ki yei puræ puthi, katwon man iwa yoosuk chooh chooh u sakhi wa ki bor pait bor pynlai kani ka College ha kani ka sngi Muchai 7 Naisaphra da chim ki wow kdar luti ya ki khynnah puræ sa ha kawi ka seiñ watip kam ka Scouts-Guides Movement kawa man kawi na ki seiñ wa em ha chityllup ki ri yong ka pyrthai.
Ha kani ka sngi neiliang ki bor pait bor pynlai ka Meghalaya Bharat Scouts & Guides dawan ki wow ya emlang nadooh u W. Lyngdoh, Jt. State Secretary, ka W. Tariang, State Training Commissioner Guides, MBS&G, Shillong, ka C. Susngi, District Training Commissioner Guides, ka Siami Shylla, District Organiser Guides, u Adiam u Bthuh, Jt. District Secretary wa u Elvis Dkhar, District Organiser Scouts, MBS&G West Jaiñtia Hills District.
Ha ka yalang wa yoochongkun hei pynlai ka Ranger Leader Thomas Jones Synod College ka Rosy Bang wa man leh kam ka Lecturer da yoh ya ki kyntien pdiang burom na ka Dr. I. Dkhar, Vice-Principal Thomas Jones Synod College katwa ya ki kyntien e mynsien ya ki Recruit Ranger da pachat da u Principal Thomas Jones Synod College u Dr. R.R. Kharkongor wei ha kani ka sngi da pynpsiah ya oo kam uwi na ki dkhot yong ka Bharat Scouts & Guides movement.
U W. Lyngdoh hei klam kam uwi na ki khlieh watoh u pait ya ka Meghalaya Bharat Scouts & Guides da ong u wa kani leh toh man ko chibynta i puræ puthi heiwa ki Scouts, Guides, Rover wa ki Ranger yoh ki chiboon ki yutip deiwa em ki hapoh kani ka Movement kiwa man ha ki dur ki rukom waphær kyrpang leh wow man ki bru kiwa ye u im miat im bha wei em mynsien u yarap ya kiwi wei wow kreh leh neibynta i miat i bha ka imlang sahlang.
Ka W. Tariang, State Training Commissioner Guides won chim ko wow khana pynsñiaw hapyrdi ki Recruit Ranger yong ka College yei kaamram iwa ki Ranger emkaam u chim ki wow leh deiwa kyrsu kyntu leh ya ki Ranger wow man kiwa em i mynsien yaichah wei kut yumut.
Ya ka bynta yong ka Investiture Ceremony ha kani ka sngi da chimkti wow pyndep da ka C. Susngi, heiwa ki khon khyllood yong ka Thomas Jones Synod College kiwa chim u pynskem kam ki Ranger yong ka Meghalaya Bharat Scouts & Guides ha kani ka sngi em ki hadooh 39 ngut.
Photos by Soolangki D Laloo
Discussion about this post