U MLA ka 2-Jowai Constituency, uwa man leh u Montri ka sorkar jylla, u Wailadmiki Shylla ynne ka sngi da pdiang burom wei pynskem u ya kiwa wan psiah thymme cha ka NPP hapoh ka Jowai Constituency ha ka yalang wa da pynman ha District Library Auditorium Mynthong Jowai.
Ha kani ka yalang pdiang burom da emlang kiwa kreh ka Party wa kynthup ya u Octomewot Lamin, Nominated MDC ka JHADC uwa man leh u District President ka NPP West Jaiñtia, uwa ksoh leh kam u State Working President, ki MDC warim ka NPP ha JHADC wa kynthup ya u Lakhon Dkhar, u Ailad Bhoi wa kiwa ksoh kaam waphær ka NPP Jowai Constituency.
U Wailadmiki hawa e yei klam pynsñiaw u i kmen wow yoo yei boon ki dur khmat thymme wa wan psiah cha ka Party, wei ngait u leh wa i wan yong ki toh neidaw ki kaam pynroi wa kreh u hapoh ka Constituency.
Kamtæ kyntu u ya ki wow ya krehlang ki chirup neini chakhmat deilang wa kiwa kyrchaan warim khnang yow ye chooh chooh u pynku yei roi i paar ha ka Constituency wa ka imlang sahlang.
Chooh chooh u Wailadmiki ong u wow man uwa mihkhmat ya ka Jowai Constituency ymtoh iwa suk neibhah wa ki chnong 50% haap ki ha sor wei 50% haap ki ha palatsor, heiwa i rukom krehkaam leh ymtoh iwa suk neibynta u pynbiang pyrla.
Katwa ye hei lai luti ong u wa da kreh u khlem da theh chiliang ya ka pyrla wei pait u leh katkam i emkaam ka Constituency, najrong wot ya ki kreh wa sahteiñ da ki phaw snem leh chim u wow pyndep khlem da kheiñ yi wa sdang ki, neibhah chim u yei kaam mihkhmat toh i kaam chakri neibynta ki paidbah, i myntoi ya ki paidbah ym neibynta ka naam.
Pynsñiaw haroh u i kmen wow yoo wa ka Jowai Constituency kawa em boon tam ki Project wa sahteiñ deiwa sdang hi-eh khlem pyndep, tangwa katni won da yoo wa man kawi na kiwa boon tam ki Project wa da ye u pyndep heipor wa biang.
Da kdaw u ya ki Project wa sahteiñ kiwa da ye pyndep wa kiwa dang lai chakhmat katni kam ka Jowai Water Suply Scheme, ka Iawmusiang Shopping Complex kawa da man ka mat Election neipor cheipor katni won su dep hi, i ye u pynkreh smat ya ka Mini Secretariat Jowai kawa booh mooyurim ha u snem 2022, neitæ ka MCH Hospital wa dei booddien yong oo hadien wa jop kam u MLA da ye u sdang krehkaam ya ka wei dang ini wadep leh da yoh ko yei naam kam ka Hospital wa khooid tam hapoh ka jylla.
Pyntip haroh u wa neibynta kani ka MCH Hospital wa Jowai Civil Hospital ka sorkar dadep mang ko leh u chna pynheh chooh chooh ya ki dei wow pynboon thaw thiah khnang yow lait khynnia wei lait ki paidbah u thiah cha madan.
Heiyatoh wa ka Kiang Nangbah Stadium ha Jowai leh pyntip u wa i pynkreh da lai i chakhmat nadooh u chna pynthymme ya ka Madan Artificial Turf, ka Athletic Track, ki thaw chong VIP wa paidbah, najrong i chna ya ki sarok yow lait sahkut kari ka sor Jowai, i chna ki luti, ki dooid wa kiwi kiwi ki kaam pynroi ha sor wa palatsor.
Napyrdi kiwa psiah thymme cha ka Party NPP leh hawa e yei klam pynsñiaw ki wa i wan psiah yong ki cha ka NPP toh lyngba i yoo ki ya ki kaam wa bha u MLA kamjooh leh ka sorkar jylla wa yahkhmat ka NPP.
Discussion about this post