Shillong: Ka Bethany Society, Shillong ynne da psiah Semi Final ki ha ka 3rd North East Blind Football Tournament, wa pynman da ka Indian Blind Football Federation, na i jop ki ar sien ha ka sngi wa le kani ka Tournament wa pynman ha Shillong Public School ynne ka sngi.
Ka Semi Final wa nyngkong u pynman mynstep heipor 9 waje i step heiwa ka North East Shower Blind Football Club (NESBFC), Arunachal Pradesh daw yachem ko waka Moran Blind School, Assam, pynbood saka Bethany Society pyrchah ya ka FABB Kolkata heipor 10:30 i step. Pynbood won saka Final heipor 1:00 i sngi kawa daw wan sakhi da ka East Khasi Hills Deputy Commissioner ka Matsiewdor War Nongbri, u Superintendent of Police CID u R. Muthu wa u CEO ka Meghalaya Football Association u Arki Nongrum.
Ynne ka sngi da em leh u Actor wa pawnaam u Victor Banerjee uwa em yatoh waka Moran Blind School. Hadien wa kut ki yalehke da ong u wa hapoh ka jylla Meghalaya u chem phi wa u lyoh wa doom wa tymmoh ya ka pyrthai da rah u hadien wa yoh u yoo yeiwa yalehke kiwa duna heibor khmat neidaw wa sñiawthooh hadooh katwon ki hap yaleh ki iwa i ym i ym em sñiawngooh i yeiwa da kyrkhu ha i.
Hawa kyruiñ won cha ki yalehke ynne ka sngi ka Bethany da pynrem ko ya ka Mizoram Blind Society da 1-0 da ka kool wa thap u India National Player u Hilter Khongphai. Da jop suk won ki da 6-0 ya ka Mont Fort School, Guwahati. Ha kani ka yalehke won u India National Player u Gabriel Nongrum da thap u 5 kool katwa u Khongphai won da thap u chi kool.
Ka Garo National Blind Football Club won da kut ka yalehke ko pyrchah ya ka Siliguri Blind School da 0-0.
Ka NESBFC da sdang ko dei jop da 1-0 ya ka FABB Kolkata da kool na u Tara Bangbang wei da pynrem ki leh sa ya ka Siliguri da 3-0 da ki le tylli ki kool (Hat Trick) na u Klingson Marak.
Sa kawi ka Hat Trick da yoh u Neerav uwa yalehke ka Moran Blind School, kiwa pynrem ya ka Newbies United da 4-0.
Ka FABB Kolkata da psiah Semi Final ko deiwa jop da 1-0 ya ka Handicapped Association of Manipur.
Discussion about this post