U MLA warim ka Mawlai, u Embhahlang B Syiemlieh deilang wa kiwa kyrchaan wa kiwa yajan kiwa em da ki spah ngut da lai pisah ki cha ka National People’s Party (NPP). Kini toh kiwa da mih noh na ka seiñ United Democratic Party wei da pdiang sñiawbha cha ka NPP da u National Vice President ka NPP, u Prestone Tynsong ha ka yalang wa pynman ha Mawlai deiwa emlang u u President ka NPP Meghalaya, u Dr. WR Kharlukhi, u MDC, u Teiborlang Pathaw wa kiwi kiwa yahkhmat ka Party.
Hawa klam ha kani ka yalang pdiang burom, u Embhah da ong u wa ini psiah yong oo wa waroh ki paralok toh yow pyntikna wa ka NPP daw jop ko ya ka Election 2023 na Mawlai deiwa ya krehlang u Teiborlang Pathaw wa u Embhalang B Syiemlieh daw pynman MLA ya u Teibor ha u snem 2023.
Da khana u wa nachwa leh wa da em ki yachem wow pynbait neibynta wow ya krehlang ha ka Election MLA 2023. Da ong u wa kiwa em ynne ka sngi toh du kiwa kitkaam wa hakhmat dooh yong ka kynhun ka yong ki, kiwa da em ha ki por wa dadep ha ka UDP.
U MLA warim da khana u leh wa hachwa wow psiah cha ka NPP da lai pynsñiaw u cha waroh kiwa kyrchaan ki yong oo wa u em noh cha ka NPP, wei da pyntip wa kiwa kyrchaan da ong ki wa toh u lai chakhmat.
U Embhah hawa e yei klam da pyntikna leh wa kini kiwa kyrchaan daw neh ki wa u Teibor wei ym em i chet kylla da kammon kammon leh.
Da ong u wa i psiah yong oo cha ka UDP ha ki por wa da dep toh neidaw wa ha kitu ki por em kiwa yahkhmat kiwa chynna jngai, tangwa katni da wiar noh ki wei pynsñiaw u wa katni da yoo wa ka NPP em ko ya kitæ kiwa yahkhmat wa chynna jngai.
Puræ leh: Pynbna ka NPP da u Teibor Pathaw wow yakhun MLA na Mawlai
