theme-sticky-logo-alt
theme-logo-alt
Advertisement ad1
Advertisement ad1
Advertisement ad1
Advertisement ad1
Advertisement ad1

Pynbna ka NPP da u Teibor Pathaw wow yakhun MLA na Mawlai

Ka National People’s Party (NPP) ynne ka sngi da pynbna ko wa u Teiborlang Pathaw u man u kam u kyrtong ka Party wow yakhun ya ka Election MLA ha u 2023 na Mawlai Constituency. Ya ini da pynbna da u National President ka Party, u Conrad K Sangma wa u National Vice President, u Prestone Tynsong ha ka yalang pdiang burom ya u Teibor cha ka NPP.

Kam u MDC ka Mawlai Constituency, u Teiborlang Pathaw da psiah pura u cha ka NPP ynne ka sngi ha i emlang kiwa kitkaam ka Party wa kiwa kyrchaan ya oo na Mawlai.

Advertisement ad1
Advertisement ad1
Advertisement ad1

U Teibor da ong u wa i daw wa psiah u cha ka NPP toh wa em ko kiwa yahkhmat wa stat heiwa da yaroh u ya i rukom kreh ka sorkar MDA wa yahkhmat ka NPP, kawa da chim ya ki rai wa khor nadooh ka Resolution Inner Line Permit, wow pynbait ya u pood wei kamjooh i kyrriah ya ki bru na Them Metor. Da ong u wa du kani ka sorkar wa yahkhmat da ka NPP wa ye u chim ya kini ki rai.

Da ong u leh wa ka NPP toh ka sur ki paidbah ka thaaiñ North East, wei lyngba yong ka daw ye u pynsñiaw ya i eh i khoo wa chem ki paidbah ka thaaiñ cha Delhi, neibhah wa du ka NPP kawa em ya ka yung krehkaam ha Delhi napyrdi ki seiñ kiwa na ka thaaiñ mihsngi.

Neiliang u Sniawbahlang Dhar uwa man u Working President ka NPP Meghalaya, da ong u wa em i kyrmen wa u Teibor Pathaw u yoh u yei jop ha ka Election 2023, heiwa da kob u leh wa ka NPP daw yoh ko wow synchaar samen hadien ka Election wei da pynsñiaw u wa na Jaiñtia Hills ka NPP ye ko wow  jop ha waroh 7 tylli ki Constituency.

U Prestone Tynsong da kyntu u ya kiwa kyrchaan ka NPP na Mawlai wow pynjop emburom ya u Teibor deiwa yaroh ya u MDC kam uwi na kiwa prat luti ya ki khynroo deiwa ye u e khih e kreh ya ki hajar ngut ki khynroo ka jylla.  

U Conrad K Sangma da ong u wa ka Party da pdiang sñiawbha ko ya u Teibor wa kiwa kyrchaan u heiwa da ong u wa u Teibor da yakreh u wa ka sorkar ha waroh ki kaam neibhah wa em u i kitkhlieh, khamtam wa ki kaam wa yatoh wa ki paidbah. 

Da ong u wa ya u Teibor ym emkaam de wow pyntipmit neibhah da man chwa u kam ka nongmuna uwa waroh da tipmit lut uwa em yei chaniah ki khynroo, uwa chwa wow klam da leh u iyi iyi ya ki khynroo deiwa wai laad wow e kreh ya ki hajar ngut deiwa pynrap wa lada elaad ya u Teibor ha ka kyrdan wa rap haneiñ, daw ye u wow leh boon kiyi kiyi neibynta ki paidbah ka chnong Mawlai.

Advertisement ad1
Share this:
Previous

Jop u Salong Lamare kam u Dolloi wa thymme ka Nartiang Elaka

Next

Daw duna i poi umkor ha Jowai ha ki sngi wow wan