U Baitlang Pohsngap uwa da dep yaleh MDC na Jowai South Constituency ha u 2019 kam u kyrtong ka Congress, da psiah noh u kam u Active Member ka UDP Circle kamjooh hapoh ka District yow kyrchaan ya u kyrtong ka UDP na Jowai Constituency, u Moonlight Pariat.
U Baitlang hawa khana yei daw wa psiah u cha ka UDP, da ong u wa ka Party Congress toh kawa da pra bha wei boon leh kiwa yahkmat da mih noh ki yow psiah cha kiwi tawon ki Party neibhah ka Congress toh ka wym poi de cheiwon cheiwon.
Wei da jied u leh ya ka Party Ri-loom namo ka Regional Party heithaw wow lai cha ki National Party neibhah ya ki National Party da seiñ ya ki da ki bru kiwa na kiwi tawon ki thaw wei lada sdang na West Bengal daw man ko neibynta wei katkam wa emkaam ki Bengali wei pynheh pynyaar won ki hadien.
Da ong u leh wa ym em hi wow chna National Party neibynta yong kiwi neibhah da pyrkhat chwa neibynta yong idæ wei i daw wa poi ki National Party hapoh ka jylla toh wa tlot kiwa yahkhmat kiwa pyrkhat du neibynta yong ki hi wei ym em pyrkhat ki neibynta ki paidbah.
Kamtæ da ong u wa deiwa em ki Regional Party te poi ka jylla chadooh katni neibhah ki toh kiwa em nadooh warim wei ka UDP toh kawi na ki Regional Party wa heh dooh hapoh ka jylla wei toh u sñiawkhaiñ wei wow sñiawsarong wow kyrchaan ya ka Party yong i hi neibhah ki National Party toh kiwa wan dang hadien.
Hajrong ini da psiah u cha ka UDP ka Party wa heh hapoh ka jylla kawa em leh i kyrmen wei ki phang krehkaam ka Party leh toh kiwa biang wei da kyntu u leh ya ki paidbah wow e kyrchaan ya kani ka Party wei wow kyrchaan leh ya u kyrtong ka UDP na Jowai, u Moonlight Pariat uwa da ih ha ka saiñhima sima wei u bru wa em ka yaichah wa i mynsien kreh chitom.
