Ka Chiarmon Dkhar, kawa naka chnong Wapungskur, East Jaintia Hills District, kawa jooh leh ya ki kaam yoowyrai ya ki yung ki sem wadooh waduk, ynne ka sngi da pteiñ biang ko yei kaam lehwyrai yong ka sa ha ka chnong Mookhep, East Jaiñtia Hills, deiwa yarap ko ya ki da u khoo mar 17 kilo kawi kawi ka manyung neibynta ki 110 tylli ki yung ki sem ki wadooh waduk kiwa da chah ktah joor bha na i khang chnong ha ka ri India neidaw yong ka kjut khlam COVID-19.
Chwa wow saam ya u khoo cha kitai ki manyung wadooh waduk yong ka chnong Mookhep, da pynman yaka yalang wa khian, wa da pynlai da u Arki Dhar, kam u Chairman chnong yong ka chnong Mookhep. Da yoh leh yei klam sñiawngooh ya ka Chiarmon Dkhar, na u waheh chnong ka chnong Mookhep, u Denis Siangshai, uwa da yaroh yei sbun mynsien wei i yoowyrai yong ka ya ki wadooh waduk ha ka imlang ka sahlang, khlem da mylliñ ko ya kiwa em ha ka chnong Mookhep. Hei klam yong u Denis Siangshai, da ngooh Blai haroh u wa u Trei Kirot u nang kyrkhu u yaka Chiarmon wa ya ka yung ka sem yong ka khnang yow nang ye ko u pteiñ yeini i kaam wa khroo yong ka ya ki kup chiliang sem chiliang ha ka imlang ka sahlang.
Ha katai ka yalang, da yoh leh yei klam sñiawngooh ya ka Chiramon Dkhar sa na u Francis Dkhar, u Secretary chnong yong ka chnong Mookhep, deiwa pyntip u wa hadien wa oo, kam u Secretary chnong, yoo u yei eh i khoo wei chem chitom kiwa chong chnong wadooh waduk yong ka chnong Mookhep, da pyrchang u thooh ya ki laad ki luti yarap ya ki deiwa yaklam wa ka Chiarmon Dkhar, boi ye ko leh wow yarap ya ki wapli. Marsien sñiaw ka Chiarmon Dkhar yeini i eh i khoo ha ka chnong Mookhep, khlem da pynslem, wut ynne ka sngi, da wan e yarap ko ya ki wapli kiwa chong chnong wa chemchitom yong ka chnong Mookhep da u khoo.
“Kam ka kong Chiarmon Dkhar rap ñiar u chem ha ka imlang ka sahlang,” ong u Francis Dkhar.
Discussion about this post