Khliehriat: Ka Meghalaya People United Front (MPUF) ynnin ka sngi da lai e yarap biang ko da u khoo cha ki 30 tylli ki manyung kiwa dooh wa duk haka chnong Nongthymme kawa em hapoh East Jaiñtia Hills mar 15kg samen ha kiwa da chah ktah naka khang chnong wa da pynkrehkaam daka sorkar kam chibynta wow yada nei poor uni u khñiang khlam COVID-19, hadooh wym yoh laad de ki u lai mylla sngi wei kani ka chnong toh kawa im jakpoh hei mylla sngi don hi.
Ha chwa wow saam ya uni u khoo da pynman yaka yalang wa khian deiwa emlang u waheh chnong kani ka chnong u Precious Sympli wa u Secretary chnong u Pyrkhat Bareh deilang wa ki dkhot chnong, heijooh i por leh da emlang u Michal Chyrmang uwa man leh u President ka MPUF-EJHD, u Johny Phawa uwa man leh u President ka Sanchnong Circle deiwa emlang ki dkhot wa kiwi kiwi.
Hakani ka yalang, u Michal hawa klam wa kiwa thoh khubor da e khublei kyrpang u ya ka chnong Nongthymme wa da smat ko wow pdiang yei e yong ka seiñ hanlada man ko kawa khian leh, chooh chooh da ong u leh neiliang yong ka seiñ ka man ko kawa smat wow yarap ya ki kup chiliang sem chiliang khamtam hakam kani ka por wa em ka khang chnong wei ym toh du heini por, da ong u leh na i por cha i por hi.
U Precious Sympli hawa klam kam u waheh chnong yong kani ka chnong, da pynsñiaw u ya i sñiawngooh hadooh kattæ kattæ ya kani ka seiñ wa da ye ko wow yarap hakam ini i por cha ki paidbah chong chnong kiwa da chah ktah na i khang chnong, neidaw yong i kjut khlam COVID-19. Neitæ i daw wym yoh laad de ki u lai mylla sngi, wei da e u i kyntien kyrkhu kyrdoh cha kani ka seiñ wow im slem ko yoh u ye chooh chooh ko wow e yei yarap ya ki kup chiliang sem chiliang na iwi i por cha iwi.
Discussion about this post