Shillong: Hanlada u Syiem ka Hima Mylliem da pynmih u ya ka hukum wa ym hoi de u ah kilo pyrchah ka aiñ ya ki mar yong ki warep ha Iewduh khamtam hadien wa da mynjur leh da ka Khasi Hill Autonomous District Council (KHADC), tangwa i ah kilo dang pteiñ hi i hadooh katni.
Ynnin ka sngi neiliang yong ki warep hapoh ka chatri yong ka Hill Farmers Union (HFU) da yoh kem ki ya uwi u bru uwa tip pyrtuid u MD Raful Ali uwa na Rongia, Assam uwa da ah kilo be-aiñ ya u piskot. Hadien wa da yoh kem ya uni u bru, neiliang yong ki dkhot ka seiñ HFU da lai ki wow ujor cha u OC yong ka thanat Mylliem, tangwa neiliang yong u OC ka thanat Mylliem da ong wa ym ye u wow chim ya kani ka ujor neidaw wa ym hap chooh hapoh i pait yong ka Hima Mylliem neidaw wa yoh kem ya uni u bru na i thaw yieñ kari ha Khlieh Iewduh.
Hadien ini, neiliang yong ka seiñ da lai ko wow ujor noh cha u OC yong ka Cantonment Beat House Anjalee. Hadien ini neiliang yong ki pulit da pynman ki ya ka takit kawa da neh kamwa 4 kynta tam.
Hadien wa dep takit da chem wa uni u baar jylla ym em u yaka License khayi lane ka Trading License. Tangwa kawa sñiaw phylla hadien kattu katni por kawi ka manbei Khasi kawa em kudam ha Khlieh Iew da wan kam ko ya utai uwa khayi toh uwa dang wan chisngi ar sngi wei toh u wakreh yong ka.
U Alfondbirth Kharsyntiew, General Secretary yong ka HFU hawa yaklam wa uwa thoh khubor da ong u wa neiliang yong ka seiñ ym chongngiah wei u yakhun bait hadooh wa ye u pyndooh ya i ah kilo kiwa lai dai ha Iewduh wa kiwi ki yaw ha ka jylla. Ka seiñ da paan ko leh ya i krehlang yong ki waheh chnong wa ki bru kiwa em ka mynsien wow yarap ya ki warep kiwa chah banbeiñ ha ka dor wa i ah kilo be-aiñ ya waroh ki mar rep.
Discussion about this post