Shillong: I pyndik ki chipai ya kiwa chong chnong da pteiñ i man ki por wei ha kani ka kynti ki chipai ka Assam Rifles da pynthut biang ki yei lai i wan ki paidbah ha ka chnong Jyntah deiwa khang ya ka yingkieñ lai kjat na Wah Umkhen.
Ka chnong Jyntah toh kawa em marjan wa ka chnong Madanrting, East Khasi Hills, kawa haap hapoh ka Mawryngkneng Constituency wei ki bru na kani ka chnong nadooh kiwa lai yaaw lai khamtam ki khynnah skur wa kiwa mylla sngi haap lai ki lyngba kani ka yingkieñ lai kjat wa da chna nadooh ki por synchaar ki pharæng, tangwa katni kani ka yingkieñ da chah khang noh ko ha ki chipai da ki sainar chieh.
Hawa yaklam wa u rangbah shnong ka Jyntah, u Arestar Sohtun da ong u wa kiwa chong chnong yachem ki chiboon i eh i khoo dei langær neidaw wa leh embor ki chipai.
“Kattu la chi tayaw wada khang ya kani ka yingkieñ da ki sainar chieh iwa da wanrah yei eh ya ki paidbah ha i lai i wan, ki paidbah haap kaap ki ya ka Wah Umkhen kawa booh hei maa ya ki paidbah khamtam heipor wa kmai um.” da ong u.
Da pyntip u wa nadooh ki rangbah shnong warim da ood ki yeini tangwa ym em wa mano ya ki hadooh wa kiwa mihkhmat leh da ieh khonswet ki ya ki.
Da ong u wa heipor nachwa da em ka soskular hapyrdi u Deputy Commissioner wa ki bor chipai wow elaad wow lai lyngba kani ka yingkieñ tangwa katni won ki chipai da sdang pyndik biang ki ya ki paidbah.
Hawa yaklam wa ki kattu katni kiwa chong chnong kawi na ki manbei da ong ko wa i leh embor ki chipai ha kani ka thaw toh iwa da palat pood wei wot wow thung ya ki morcha ha ki kpær ki bru paidbah iwa da pynbor ya ki wow dai noh ya ki kpær cha kiwi tawon ki bru.
Discussion about this post